U Nongsaiñ Hima,1983
Lah ban ong ba wat ki ri khrawbor ka pyrthei ki long ki ri kiba rep bha shibun bad ha ka rukom rep ha ki por mynta. Namar khlem ka rep, ki sngewthuh shai ba yn ym lah ban bsa ïa ki karkhana bad ruh ïa ka kpoh ki briew.
Ha ka ri India hi baroh kawei don bun bah ki nong-rep bad bun na kdi ki rep da ki kor puh, kor lur, kiba lah ban puh bad lur da ki spah akar shisngi shisngi. Ka don ka jingpyrshang kaba khraw na ka liang ka Sorkar ban pynshlur ïa ki briew ban rep bun khnang ban lait ka pan kylliang bam na ki bor Hima.
Ka ri Khasi Jaintia jong ngi ruh ka dei ka ri rep hynrei ka jingpynmih bam pat ka duna shibun eh namar ka rukom rep kam pat long da ki rukom rep jong ki por mynta.
Ha kane ka ri Khasi – Jaiñtia don bun ki jaka kiba seisoh kiba lah ban pynmih spah lada ki trai ri ki nang ban pyndonkam ïa ka. Ka rep ka long kaba kongsan eh kaba dei ban ïa phai mynta. Namar lada duna ne ym don bam kam don jingmyntoi eiei ïa ka jaidbynriew wat lada ka long ba ngi la nang la stad bad nang kiew shaphrang ha baroh ki liang. Ka bam ka long ka tynrai ïa kiei kiei baroh, bad lada kane ka tynrai ka tlot ka mynsiem bad baroh phar ki swat bad tlot noh kum ki sla dieng ha ki por synrai. Ka ri Khasi – Jaintia kaba ki ong ka ri u soh u pai ka long ka ri kaba tah ban bsa hi dalade, hynrei ia bun ki jaka rep baseisoh la pynlehnohei bad pynsepei.
Lah ban pynkhie im pat ban pynroi pynbha ïa ka rep ka riang, tang lada ki nongrep jong ngi ki pyrkhat thymmai. Ki dei ban rep katba ki lah khlem ka jingpynlehnoh ei ïa kano kano ka jaka, da ki buit bad ki lad thymmai kiba lah ban ioh jingtip na ki trai treikam rep ka Sorkar. Ki nong-rep kim dei ban lehsting, ban die ne ai lad noh ïa u mynder kum ki khar kuti ban ktah ïa ki jaka rep.
Ki samla na ki jaka rep kiba leit ban wad jingnang jingstad ki dei ban leit phai pat sha la ki jaka rep ban nang kham pynbha bad pynseisoh ïa ki, ym ban hun tang ha ki kam shong shuki ha ki office ha sor. Ki nong-rep kim dei shuh ban ai ïa u khaw u kba sha ki pata shet kiad, ki nongshet kiad ki dei ban wad noh da kiwei ki lad ban shet kiad kum na kiwei pat ki jingthung kum ki kynja soh kynja pai.
Ki jaka rep ki long ki spah bad jingkyrmen jong ka ri bad jaidbynriew bad ki nongrep pat ki long ki paia kiba ka ri bad jaidbynriew ki shaniah. Lada u nongrep u riewspah u pahuh, ka ri bad jaidbynriew ka long ruh kumjuh bad lada u nongrep pat u duk u shitom ka ri ka shong ha tmier ka apot kaba yn ïahap tang ban shu ïa tong um ne thoh-dieng ïano re.
