I. R. Dkhar
Ka long kaei kaei kaba pynsngewdiaw mynsiem ïa ki kmie ki kpa, ki para ki pyrsa, kiba haïing hasem, ïa ki paradoh parasnam bad ïa ka jaitbynriew hi baroh kawei ba balei ki khynnah Khasi jong ngi kim wan shakhmat ha ki jingïaleh jong ki ha kane ka eksamin Secondary School Leaving Certificate (SSLC) ne ka Matric kaba ngi ong mynta u snem.Ngi tip ïa kane ka result ha ka 8 tarik u Ïaïong, 2026 ha kaba la pynbna da ka Meghalaya Board of School Education (MBOSE), kumba ngi tip ruh na ki Kotkhubor. Kane ka jinghiar ki khynnah Khasi ha ka result jong ka SSLC, 2026, ka la pynjew bad pynjem-rngiew ïa ngi ka jaitbynriew Khasi. Ka jingkylli ka long balei ki khynnah Khasi jong ngi, kim poi banyngkong ne ba-ar ne balai ne kim poi shakhmat, katba kiwei pat ki jaitbynriew ki poi shakhmat. Hato ki khynnah Khasi ki duna ka jingmut jingpyrkhat, ka jabieng ne ka khlieh ban khreh kot ? Hato tang ki khynnah dkhar ki nep ka jabieng ha ka pule puthi ne ki stad ? U Blei Um shym la ai shiliang ïa ka ja-bieng, ka jingnang jingstad. U Blei U ai kumjuh ïa ki khynnah, ïa ki briew baroh. Ka shong ha ka jingstad ban pyndonkam ïa ka jabieng, ka jingmut jingpyrkhat kaba U Blei u la ai. U Blei Um leh shiliang ne um ai shiliang ïano ïano. Ka ktien ka ong, U Blei U Iarap ïa kito kiba ïarap ïalade.
Ha kane ka SSLC kaba dang shu dep mynta u snem 2026, ngi la tip, na ki Kotkhubor, u Wangal Lama u ioh top ha ka SSLC, 2026 na ka Embgee Rosebud Higher Secondary School Tura, Prajukta Roy na ka Seven Set Hr. Sec. School, Shillong bad Prinita Das na ka Pechoon A Sangma Memorial Public School, Tura. Kiwei ki skul na Shillong, Jaiñtia bad Bhoi kim paw. Tang shu pynbna ïa katei ka SSLC Result ba ki khynnah Khasi jong ngi, kim poi shakhmat, ka pynpyrkhat ïa ngi ba balei ki khynnah jong ngi kim poi shakhmat. Ym tang ha une u snem, katba nga kynmaw, lada ngam bakla, ha ki snem ba la dep ruh, ki khynnah Khasi jong ngi kim poi ha ka kyrdan banyngkong eh ne ba-ar, balai ter ter. Ki khynnah Khasi ki poi shadien-shadien. Nga ngeit ba ma ngi ruh kum ka jaitbynriew, ka pynpyrkhat bad pynlyngngoh ïa kane.Lada ka long ha kane ka rukom, imat ha ki snem ban wan ruh, ki jong ngi ki nang jah nang jah shatrai. Bad haba kumta shano ngi poi. Ngin sa shah ñion-shi-shah ñion ha kiwei ki jaitbynriew. Kin sa nang paw nang paw kiwei pat ki jaitbynriew, ka pynlehraiñ ïa ngi bad mano ban tip ba ngin sa shah synshar ha kiwei pat ki jaitbynriew ruh.Phi tip ba ka tynrai jong ka jingnang jingstad ka dei naduh high school, secondary bad shalor shuh shuh ne higher education. Kumba ka ktien ka ju ong, ki samla ki long ka lawei jong ka jaitbynriew. Lada ki khynnah samla naduh high school shaduh matrik ter ter shaduh ki degree level, kumno kin lah ban ïaleh ïa ki competitive examinations ? Ka tynrai ban ïaleh bad ban jop ha ki Civil Services ka shong ha ka jingstad naduh high school ne matrik, nangta shalor shuh shuh ne higher shaduh degree level.
Ka jingkylli ka long, lada kiwei ki jaitbynriew ki nang ki stad bad ki poi sha ki kyrdan shalor, balei ki khynnah Khasi jong ngi kim lah ! Ka daw bakongsan ka long ka jingjaituh bad ka jinglapmiet ha ki kam kai. Kim don ïa ka jingpyrkhat ban khreh kot da ka jingminot bad ka jingleh shitom ban kiew shaphrang. Ki khynnah Khasi jong ngi, kumba lehse baroh ngi ïohi ha kane ka juk mynta, ki lapmiet ha ki kam kai kum ha ka jingpynlut por ha ki mobile, jingpyrngia ha ka put ka tem, ka jingshangkai shane shatai bad kiwei kiwei ki kam kai ki bym seisoh eiei. Tang haba don ka jingpynbyrngia da ka Sorkar kum ha ki festival bapher bapher na ka por sha ka por ban khring ïa ki paidbah, ki khynnah samla ki la ngop. Ka jingmut jingpyrkhat jong ki sha ka kot ka sla, sha ka jingpule, ka la tan noh bad pynjaituh ïa ki. Namarkata, ki khynnah samla, ki la dei ban kot sha ka jingmut jingpyrkhat kaba rangbah, kim dei shuh ban shah pynngop ha ki kam kai, ki kam pynbyrngia.Ka lawei kaba phyrnai bad ka lawei jong ka jaitbynriew ka shong ha ki samla.
