Washington, Iaiong:
Katkum ki khubor, la ong ba ka White House, ka la sdang ban wad ia u briew ban long kum heh ba thymmai jong ka Pentagon.
Da kaba kdew ïa uwei u heh sorkar jong ka US uba ym shym la ai kyrteng, ka NPR ka la ïathuh ba kane ka kam ka la sdang hadien ba ka The New York Times (NYT) ka la ïathuh ha ka Sngi U Blei ba u Hegseth u la ïasam ïa ki jingtip shaphang ki jinghiar thma jong ka US pyrshah ïa ki lehnoh Houthi ha Yemen ha ka 15 tarik u Lber ha ka jingïakren lyngba ka Signal Messaging Chat.
Katkum ka kaiphod jong katei ka tnat pathai khubor, u Hegseth u la ïasam ïa ki jingtip kiba rieh, kynthup ïa ki por ïaid liengsuiñ F/A-18 Hornet, bad kawei ka kynhun shimet kaba la ai kyrteng “Defense”. Kane ka kynhun ka kynthup ïa ka tnga jong u, ka Jennifer Hegseth (ka nongpynmih barim jong ka Fox News), u hynmen jong u, u nongïasaid aiñ shimet jong u, bad kumba shiphew ngut kiwei pat na ka kynhun ba hapoh jong u.
Kane ka khubor na katei ka tnat, ka long ruh hadien ka jingpynbna kaba kham mynshwa da ka tnat pathai khubor ‘The Atlantic’, kaba la pynpaw ia ka jingdon jong kawei pat ka ‘Signal chat’, ha kaba ha kaba sdang, la thmu na ka bynta ki heh jong ka tnat iada ri.
U Hegseth ha kine ki khyndiat por ba la leit, u la dep ban mad ïa ka jingïakynad halor ka jingpynbna jong u ba u la ïasam ïa ki jingtip ba bniah halor ki jingïakhih ha Yemen ha ka jingïakren ba kyrpang jong ka Signal kaba la pynïasoh da kaba bakla ïa u nongthoh khubor.
