Jeddah, Iaiong:
U Narendra Modi, Myntri Rangbahduh ka ri India, u la leit ban iakynduh markhmat ia u Syiem jong ka Saudi Arabia, Mohammed bin Salman, ha Jeddah ha kaba kine ar ngut ki nong-ialam ki la ioh ban iakren jylliew ha kaba iadei bad ki kam- ki jam jong kitei arliang mamla. Ha kane ka sngi la soi ia saw tylli ki jingiateh ba kongsan hadien ka jingialang kaba la neh da ki kynta hapdeng kine ar ngut ki nongialam. U PM Modi, uba la dei ruh ban leit sha ka jingkhawai miet jong ka jylla bad ban ai jingkren sha ki nong India, um shym la lah ban leh kumta namar ba u la pynlyngkot ïa ka jingleit jngoh jong u halor ka jingshah thombor ha Kashmir kaba la shim ia ka jingim jong 26 ngut ki briew, kiba bun na ki ki dei ki nongjngohkai pyrthei bad katto-katne ngut kiwei pat kiba la mynsaw.
Ka jingleit jngoh jong u PM Modi sha Saudi Arabia ka long kaba kongsan bha ha ka liang ka ka jingiatreilang jong ka India bad ka Saudi. Ki ar tylli ki jaitbynriew ki dang trei ban kyntiew ia ka jingiadei jong ki sha ka kyrdan kaba thymmai pura. Namar la ong ba ka India bad ka Saudi ki la long lypa ki paralok ba kongsan ha kane ka thaiñ bad ki dei ki paralok ba kongsan ha ka liang ka jingïada ri ruh kumjuh. Ha ka jing-ialang jongki ha ka Sngi Ba-ar, kitei ki arliang mamla ki la thaw ar tylli ki komiti myntri ba thymmai, kynthup ia kawei kaba iadei bad ka kam iada ri, bad ki la mynjur ban iatreilang ban seng ar tylli ki karkhana pynkhuid umphniang ha India.
Ia ka liengsuiñ jong u Modi- ka Air India One – la synran da ki katto katne ki liengsuiñ ïapom F-15 jong ka Saudi Air Force, kum ka dak jong ka jingburom kaba la pyni burom kyrpang tang na ka bynta kito ki paralok ba jan tam eh jong ka Saudi bad kum ka dak ka jingpyntikna ia ka jingiada bad jingshngaiñ jong u Myntri Rangbahduh ka India haba u leit sha katei ka ri. Ka jingleh jong ka Royal Saudi Air Force ka pynpaw ruh ïa ka jingïatreilang ha ka liang ka jingïada ri kaba nang jylliew bha hapdeng kine ki ar tylli ki ri.
