Kyiv, Iaiong:
U President ka Ukraine, u Volodymyr Zelensky, ha ka Sngi Ba-ar u la ong ba ka Ukraine kan long kaba la khreh ban ïakren bad ka Russia ha kano kano ka rukom shisien ba ka Russia ka kular ban wanrah ia ka jingsangeh thma bad ba ka jingïakhun hapdeng ki shipai ka Ukraine bad Russia kan kut noh.
U nongïalam ka Ukraine u la ong ruh ha ki nongthoh khubor ha ka jingïalang ba ka kynhun jong ka Ukraine kaba ïakynduh ïa ki ophisar na ki ri Sepngi ha London ha ka Sngi Ba-ar kan don ïa ka jingbthah ban ïakren halor ka jingsangeh thma kaba pura ne kaba shi bynta bad kane.
Kumta u Zelensky ha katei ka sngi u la kren da kaba shai bad ong “Ngi long kiba la pynkhreh ban buh jingthoh ba hadien ka jingsangeh thma, ngi la pynkhreh ban shong ha kano kano ka rukom khnang ba kin ym don ki lynti kiba ïap.”
Namar u la ong ba kam long kaba suk ban shu rai kyrkieh ia kiei- kiei baroh bad u la maham ruh da kaba kdew ïa kiba bun ki mat kiba jylliew bha kum ka lad bad ka ki jingpyntikna ïa ka jingïada bad ka jing angnud jong ka Ukraine ban long ka dkhot jong ka Ukraine hapoh ka kynhun NATO.
Ka jingiakren ha London, kaba thmu ban pyniasoh lang ia ki heh sorkar na ka ri America, ka ri Bilat, ka ri France, ka ri Germany bad ka ri Ukraine, ka wan hapdeng ka jingkhihwin jong ki jingiakhih ba jur bha ba la ialam da ka US ban wad ia ka lad ban pynkut noh ia ka thma jong ka Russia bad ka Ukraine.
U Zelensky u la ong ba u dap da ka jingkmen ban ioh ka lad ban iakynduh ia u President ka America u Donald Trump ha kaba kut jong kane ka taiew hapdeng ka jingleit iadon bynta jongki ban sakhi ia ka jingpyndep burom ia ka met ba sah jong u Pope Francis.
