Jowai/Nongstoiñ, Ïaïong 23
Ka lympung ïalehkai ‘Dis -trict Level Inter School Athletic Meet 2025’ ba la pynïaid da ka shlem treikam u District Sports Officer (DSO), West Jaiñtia Hills ryngkat ka jingïatreilang bad ka West Jaiñtia District Sports Association (WJDSA) ka la sdang ha ka sngi Balang ha Kiang Nangbah Stadium, Jowai.
Ha kane ka lympung ïalehkai kaba lai sngi lynter, la wan shim bynta da kumba 900 ngut ki khynnah shynrang bad kynthei na ki 28 tylli ki skul na kylleng ka District ha la ki jong ki jong ki kyrdan ïalehkai kiba kynthup naduh ka Under-14, Under-16 bad Under-18.
Ïa kane ka lympung la plie da ka Kong A.P Syiem, Joint Director School Education & Lite-racy, Government of Meghalaya kaba la kitbok kitrwiang ïa baroh ki khynnah kiba ïashim bynta bad pynpaw ruh ba kane ka jingïalehkai ka pynwandur ïa ka jinglong bad ka lawei jong ki khynnah, bad lyngba kum kine ki rynsan ka ailad ïa ki khynnah ba kin pyni ïa ki sap ki jong ki.
La ïadon lang ruh u DSO Bah Khroobok Passah bad u Bah Patrick Lamare, Vice President ka WJDSA, nalor ki nonghikai bad khynnah skul. Ha ka sngi sdang la pyndep ïa ki jingïalehkai kynthup naduh ka Shot-put, High Jump, Long jump, ki jingïakop mareh 60 mitar, 100 mitar, 300 mitar, 1000 mitar ha kaba ki khynnah shynrang bad kynthei ki la ïashim bynta shitrhem ban pyni ïa la ki sap.
Ïa kane lympung la sdang ruh ha Nongstoiñ, West Khasi Hills ha kaba la wan shim bynta da 26 tylli ki skul kiba na kane ka district. Ka jingdon ki khynnah kiba la wan shim bynta ki long kumba 952 ngut na ki 26 tylli ki skul, ba kynthup 492 ngut ki khynnah shynrang bad 460 ngut ki khynnah kynthei.
Ha kane ka sngi plie pyrda ïa kane ka lympung, u Bah S. Masar, Executive Engineer PWD Roads Nongstoiñ Division u la long kum kongsan ha ka jingdon ryngkat lang ka Kong Balarina Syiem, DSO West Khasi Hills, kiwei pat ki nongtrei sorkar, ki principal, ki nonghikai bad kiwei pat ki nongshah khot sngewbha.
Shuh shuh ha kane ka sngi sdang ïa kane ka lympung, la ïoh ïa ka jingïashim bynta shit-rhem na ki khynnah ha ki jingïalehkai bapher bapher ba kynthup ïa ka jingïakop mareh kaba 100 mitar jong ki Under-18 ki kynthei bad shynrang, bad kiwei kiwei.
