Nongstoiñ, Ïaïong 23
Ka Pyndengrei SCSC ka la ïoh ïa ka jingjop bad rung syndon sha ka final ha ka Super Division jong ka NDSA Premier League Football Tournament 2024-25 ba la pynlong da ka Nongstoiñ District Sports Association.
Kane ka jinglah ban pynthikna ka la wan hadien ba ka la lah ban pynliem noh ïa ka Sawlad SC da 2-1 kol ha ka jingïalehkai qualifier -2 kaba la long ha ka sngi Balang ha madan New Nongstoiñ.
Haba phai sha katei ka jingïakhun hapdeng kitei ar tylli ki kynhun ka la long shisha ka jingïalehkai kaba itynnad bad kaba ïakhaid bha bad pynhun ruh ïa kiba bun ki paidbah nongwan peit kai.
Ha ka jingshisha, dei ka Sawlad SC kaba la ïoh nyngkong ban pynkhih jar nyngkong ha ka minit kaba 36 lyngba u Kyrshanlang Tariang, hynrei ka Pyndengrei ka la lah ban pynphai kylla haduh ar kol lyngba u Silvester Thongni ha ka minit kaba 47, bad kumjuh ha ka minit kaba 76 na ka bynta ban jop shi syndon.
Na ka liang ka Football Committee jong ka NDSA, ka la pyntip ba ka jingïalehkai semi final jong ka 1st Division kan long ha ka 25 tarik mynta u bnai hapdeng ka Nongpyndeng SS&CC pyrshah ïa ka Mawkhlam SC ha ka por 2 baje nohphai, kumjuh ha ka 26 tarik ka Ladnongsba SC ïa ka Nongkhlaw ha ka por 2 baje nohphai sngi.
