Washington, Jymmang:
Uwei u briew uba dei na ka nongbah Illinois u la shah rai pynrem ha ka Sngi Thohdieng da kaba un pynshong patok haduh 53 snem hadien ba ka kynhun bishar ka la rai pynrem ïa u halor ka jingpynïap ïa u khynnah nong Palestine America ba dang 6 snem ka rta bad pynmynsaw jur pat ïa ka kmie jong u na ka jingshah shoh ha u bnai Risaw 2023.
U Joseph Czuba, 73 snem ka rta, u la shoh bad pyniap ia u Wadee Alfayoumi bad pynmynsaw da ka tari ia ka Hanan Shaheen tang hadien katto-katne sngi ba ka paralok jong ka U.S, ka Israel, ka la leit hiar thma sha nongbah Gaza hadien ka jingleit thombor jong ki lehnoh Hamas ia ka Israel ha ka 7 tarik u Risaw 2023.
Ki nongmudui ki la ong ba katei ka kam thombor ka long kawei na ki jingjia ba nyngkong bad ba shyrkhei tam ha U.S. naduh ba la khie ka thma hapdeng ka Israel bad ka Hamas hapoh nongbah Gaza bad kane ka la wanrah ruh ia ka jingisih jaitbynriew pyrshah ia ki jaitbynriew Muslim.
U Czuba, u dei u trai iing jong ka Shaheen bad u khun jong ka. U la pom dusmon haduh 26 sien ia utei u khynnah da kaba wait heh kaba don ki bniat kiba heh 7 inshi (18 cm), la iathuh ki bor pyniaid. Kumta ruh katei ka kmie ka la mynsaw jur na ka jingshah shoh bad pom ha utei u runar ha katei ka jingjia hapoh ka shnong Plainfield Township kaba don kumba 40 mer (64 km) sha ka phang Shathie Lam Mihngi jong ka nongbah Chicago.
Haba iadei bad kane, u Czuba u la shah pynngat kyndon noh ha kaba kut jong u bnai Rymphang. Ka Shaheen ka la sakhi ha ka jingbishar ba u Czuba u la ong ia ka “Pha, kum ka Muslim, pha dei hok ban iap.”
La ong ba don ruh kiwei pat ki jingjia ba dang shen kiba la wanrah jingsyier ia ka shongsuk- shongsaiñ ha U.S. halor ka jingsngew pyrshah ïa ki nong Arab bad ki nong Palestine ki kynthup ïa ka jingthmu ban pynngam jyllop ïa kawei ka khynnah kynthei kaba dang 3 snem ka rta na Palestine America bad ka jingshah shoh ïa uwei u rangbah nong Palestine America, kine baroh ar ki long ha Texas.
Ki jingjia kiba pynmih jingsyier halor ka jinglong pyrshah Jiw bad ki jinglong pyrshah Israel ki kynthup ïa ka jingthmu bym shym la jop ban hiar thma ïa kawei ka centre jong ki Jiw ha New York bad ka jingthang ding ïa ka ïing sah jong u Lat jong ka Pennsylvania, u Josh Shapiro.
Ki jingjia ba sngewsih ruh ki la paw ha ki por ba don ki jing-iakhih bad ki jingiakhih pyrshah kiba iadei bad ka thma.
