Shillong, Jymmang 04
Ka Meghalaya ka la ïoh jaka ban jam sha ka quarter-final ha ka lympung ïalehkai Swami Vivekananda U-20 Men’s National Football Championship, hadien ba ka la pynliem noh ïa ka Kerala da 2-1 kol ha ka sngi Saitjaiñ ha madan Ramakrishna Mission Ashrama.
Kane ka la wan urlong lyngba u Banlamkupar Rynjah (27′) bad u Deibormame Tongper (68′), katba ka Kerala ka la lah ban pynphai shwa ban wai lyngba ka penalty da u Mohammed Adhnan (90+1′).
Lyngba kane ka jingjop, ka Meghalaya ka la ïoh ban bat ïa ka kyrdan ba hakhlieh ha ka Group-A ryngkat 6 point bad ha ka jingïalehkai ba la dep ka Meghalaya ka la pynliem ïa ka Rajasthan da 4-0 kol. Katba ka Kerala ruh kaba don mar katjuh ka poiñ ka la kut noh ka jingïaid lynti namar ka jingsangeh shim bynta ka Jammu & Kashmir.
Hapdeng kane ka jingïakhun, ka Meghalaya ka la pynkhih jar nyngkong eh lyngba u Banlam-kupar Rynjah ha ka mint kaba 27 ha kaba u rangapkol ka Kerala um shym la lah ban khanglad na kane ka jingshah thep.
Hadien ba la bteng ïa ka jingïakhun jong ka kylla miet, ka Meghalaya ka la pynbud biang ïa ka kol kaba ar lyngba u Deibormame Tongper ha ka minit kaba 68 na ka daw ka jingbakla u rangapkol ka liang pyrshah.
Wat lada ka Kerala ka la shah thep haduh ar kol, hynrei shwa ban wai ka la lah pat ban pynphai kylla shi kol lyngba ka penalty na u Mohammed Adhnan hynrei ka la mad ïa ka jingshah rem.
Ka Meghalaya wat la ka la lah ban pynthikna ban jam sha ka quarter final pynban ka dangsah sa kawei ka jingïakhun pyrshah ïa ka Bihar mynta ka Lah Sngi U Blei.
