Tehran, Naitung:
Ka Iran ha ka Sngi Palei, ka la pynbna ba la plie biang ia ki lynti liengsuiñ ha baroh ka haw-haw jong ka hadien ba la pyntikna ba ka thma bad jing-iakynad bad ka Israel ka la kut noh bad ym don shuh kano-kano ka jingma ia ka leit-ka wan ki liengsuiñ jong katei ka ri. Ka Iran ka la plie biang ia baroh ki Kad Liengsuiñ hadien ba la khang khyrdep noh ia ki baroh ha ka 13 tarik u Jylliew namar jong katei ka thma bad ka Israel.
Ki Kad Liengsuiñ shabar jong ka Mehrabad bad Imam Khomeini jong ka Iran ryngkat bad baroh kito ki Kad Liengsuiñ kiba sha Shatei, Mihngi, Sepngi bad Shathie jong katei ka ri la plie biang noh baroh bad la pyntikna ruh ba ki la pynkhreh biang ban sdang treikam beit noh kumba ju long baroh shi katta.
Ka Iran ha katei ka Sngi Palei ka la pynbna ba baroh ki Kad Liengsuiñ hapoh ka ri, kin sdang treikam beit noh naduh ka 5:00 baje mynstep haduh 6:00 baje jan miet, lait noh tang ia ki Kad Liengsuiñha Isfahan bad Tabriz.
Ia ki Kad Liengsuiñ na kine ki ar tylli ki nongbah pat yn sa pyntreikam ynda la pynbna da ki tnat ba dei khmih hadien ba la dep ban pynbit- pynbiang bad peit-thuh bha ia ka jinglong- jingman baroh.
Namar la ong ba ka Iran ka la khang dam noh ia baroh ki Kad Liengsuiñ ha kylleng jong ka ri mynshem bnai hadien ba la mih ka jingiakynad kaba jur bad ka Israel kaba la neh haduh 12 sngi lynter. Ka jingsangeh iasiat hapdeng kine ki ri ka la sdang ban treikam naduh ka 24 tarik jong u bnai Jylliew.
