Brasilia, Nailar:
Katba ka jingbuh khajna jong ka U.S. halor ki mar jong ka Brazil ka la kiew sha ka 50% ha ka Sngi Balang, u President ka Brazil, u Luiz Inacio Lula da Silva haba ai jingkren shs ki nongthoh khubor, u la ong ba um i-don lad ne don jaka ia u ban iakren markhmat bad u President ka US- u Donald Trump, namar kan wanrah jinglehraiñ bad pynjah burom ia u hi.
Watla katta, u la ong ba ka Brazil kam pat buh jingmut ban siew kylliang ia ka jingbuh khajna jong ka US bad ka sorkar jong u kan ym ailad ruh ia ka jingiakren ha ka kyrdan ka kynhun Myntri. Hynrei u Lula hi um shym la kyrkieh ban leit iakren sha White House.
Namar la ong ba watla ka jingshalan mar shabar jong ka Brazil ka ïakynduh ïa kawei na ki khajna kaba heh tam ba la buh da u Trump, ki jingbuh kyndon ba thymmai jong ka US ia ka khaïi- pateng jong ka Brazil, kim lah ban pynthut ïa ka ïoh- ka kot kaba heh tam jong katei ka ri Latin America, kaba ailad ïa u Lula ban ïeng pyrshah ïa u Trump ban ïa kiba bun ki nongïalam jong ka ri Sepngi.
U Lula u la batai ïa ka jingïadei hapdeng ka U.S. bad ka Brazil hadien ba u Trump u la wanrah ïa ki khajna ba thymmai bad ka jingdawa jong u ban pynkut noh ïa ka jingmudui ïa u President barim jong ka liang ka diang- u Jair Bolsonaro, uba dang sah hapdeng ka jingbishar namar ka jingshah kynnoh ba u thmu ban pynthud ïa ka ilekshon jong u snem 2022.
Kumta ruh u la ong ba ka Supreme Court jong ka Brazil, kaba dang bishar ia ka mukotduma pyrshah ia u Bolsonaro, “kam kheiñ snep ia kaei kaba u Trump u ong bad kam dei hi ruh ka hok jong u ban leit tuklar haba iadei bad kane”, da kaba bynrap ba u Bolsonaro u dei ban iakynduh biang ia ka jingbishar namar ba u la ialeh pyrshah ia ka jingwan tuklar jong u Trump, da kaba khot ia u President barim jong ka ri kum u “nongshet kylla ia ka ri.”
“Ngi la dep map ia ka jingwan tuklar jong ka U.S. ha ka jingshah pynkhihwin ha ka snem 1964”, la ong u Lula, uba la ioh ia ka jingsdang jong u ha ka saiñ pyrthei kum u nongialam sengbhalang uba pyrshah ia ka sorkar shipai ha kitei ki snem. “Hynrei kane mynta kam dei ka jingwan rung kaba rit. Ka dei u president jong ka ri America uba pyrkhat ba u lah ban bthah ia ki kyndon na ka bynta ka ri kaba synshar hi kum ka Brazil. Kam long kaba lah ban pdiang.”
U Lula u la ong ba ki myntri jong u ki dang ïaleh ban tha lad ïa ka jingïakren bad ki paralok jong ka U.S., kumta ka sorkar jong u ka la pynleit jingmut ha ki lad ki lynti hapoh ka ri ban pynduna ïa ka jingshah ktah ha ka liang ka ioh- ka kot na ki khajna ba la buh da ka U.S..
U la ong ruh ba u thmu ban khot ïa ki nongïalam na ka kynhun jong ki ri kiba dang kiew ha ka BRICS, kaba sdang na ka India bad ka China, ban ïakren halor ka jinglah ban ïakhun pyrshah ïa ki khajna jong ka U.S.
