Islamabad, Nailar:
Ki pulit ka Pakistan ha ka Sngi Ba-ar, ki la kem ia palat 200 ngut ki nongkyrshan jong u Myntri Rangbahduh barim katei ka ri- u Imran Khan, katba ki dang iamih paidbah ban dawa phah pyllait noh ia utei u nongialam barim jong ka ri, uba ka jingshah set patok jong u, ka la dap 2 snem kynthih ha katei ka sngi.
Kitei kiba shah kem ki kynthup ia ka Rehana Dar, 73 snem ka rta, kaba long ka nongialam saiñ pyrthei bad ka dkhot jong ka seng u Imran Khan hi, kaba la ïakhun pyrshah ia ka sorkar jong u Myntri Rangbahduh – u Shehbaz Sharif. Ha katei ka sngi, la iohi ia ka, ba ka la shah thep hapoh ka trok pulit ha ka thaiñ Northeast jong ka nongbah Lahore.
U nongrahktien jong ka seng Pakistan Tehre-ek-e-Insaf, u la iathuh ba ym tang ba ki nongkyrshan katei ka seng ki la shah kem, hynrei ki pulit bad ki bor pahara ba la phah da ki bor pyniaid bad ka sorkar, ki la tied- la bom da ki lathi ia kitei ki paidbah nongkyrshan ka PTI bad ki pyndonkam ruh da ki tdem pynsat khmat ban pynpra ia u paidbah uba ialum ha katei ka nongbah ban dawa ia ka jingpyllait noh ia utei u nongialam barim jong ka ri.
