Washington, Risaw:
Ka sorkar jong u President Donald Trump ka US, ka la mynjur ban phah ia ka $230 million naka bynta ki shipai pahara jong ka Lebanon ha kane ka taiew katba ki dang pynbor ban pynduh noh ia ki tiar ïakhun jong ka kynhun kieng atiar kaba donbor shisien ka Hezbollah.
Katkum ki kaiphod ba la ioh lum da ki tyllong khubor ka Lebanon kaba tip bha ia katei ka rai, ka iathuh ba katei ka jingnoh synñiang pisa jong ka US, ka kynthup ia ka $190 Million naka bynta ki shipai jong ka Lebanon bad $40 million naka bynta ki shipai pahara hapoh katei ka ri.
Ki nongïarap jong ka U.S. kiba dei na ka liang jong ka Democrat, ki la ong ba ïa kane ka pisa la pyllait tang shu kut ka snem mang tyngka jong ka Washington ha ka 30 tarik u Nailur. “Na ka bynta ka ri kaba rit kum ka Lebanon, kata ka long shisha, kaba donkam shisha”, la ong uwei na ki nongiarap ha ka jingiakren bad ki nongthoh khubor, da kaba pan ban nym pynpaw kyrteng khnang ban kren laitluid.
Ka tnat kam bar ri jong ka U.S. kam shym la jubab ia ka jingkylli ban ioh jingtip. Ia kane ka jingai pisa la pyllait ha ka por ba ka sorkar jong u president ka Republican ka la pynduna ia kiba bun ki prokram ai jingiarap nabar ri, da kaba ong ba ka jingthmu ba kongsan jong ka ha kaba pynlut ia ka pisa jong ki nongsiew khajna ka dei ka America Nyngkong.
Ka jingpyllait ia ka pisa ka la paw ba ka pyni ia ka jingbuh hakhmat eh kaba u Trump u la buh ha kaba pyrshang ban pynbeit ia ka jingiakynad ha Gaza bad ha ka thain kaba kham heh.
Ka jingialeh hapdeng ka Israel bad ka Lebanon kaba la sdang naduh shisnem mynshwa ka la pynjot ia ka Hezbollah bad ka la iehnoh ia ki jaka jong ka Lebanon ha ki jingjot.
U President Joseph Aoun bad u Myntri Rangbahduh ka ri u Nawaf Salam ki la bthah ïa ki shipai ba la kyrshan da ka U.S. ha ka 5 tarik u Naiwieng ban thaw ïa ka plan ban pynthikna ba baroh ki tiar ïaleh ha kylleng ka ri kin don ha ka kti jong ki bor pahara ha kaba kut jong une u snem.
Ka Hezbollah ka la kyntait ia ki jingkhot ban weng ia ki tiar ialeh naduh ka thma ba shyrkhei bad ka Israel. Hynrei katei ka kynhun kaba la kyrshan da ka Iran, ka don hapdeng ka jingpynbor, ba kan aiti noh ia ki tiar ialeh jongka, na ki nongialeh pyrshah jongka ha Lebanon bad na Washington.
Ka tyllong khubor na Lebanon ka la ong ba katei ka jingai pisa kan ailad ia ki shipai pahara hapoh ka ri ban shimti ia ka jingpahara hapoh ka ri ha Lebanon khnang ba ka LAF kan lah ban pynleit jingmut ha kiwei pat ki kam kiba kongsan.
