Washington, Risaw:
Ki kmie ki kpa jong kawei ka samla pule kolej ha ka jingshah tynrah kali Tesla ki ong ba ka la shah pyniap ha ki thylliej ding bad ka tdem katba ka dang pyrshang hynrei kam shym la lah ban lait na ka kali kaba la thang namar ka jingduna ha ka rukom shna kaba pynlong ia ka ban shem jingeh ban plie ia ki jingkhang ha ki ding, ong ka mukotduma ba la mudui ha ka Sngi Palei.
Ki kmie ki kpa jong ka Krysta Tsukahara ki kynnoh ba ka kompeni kaba la pynheh spah ïa u Elon Musk, ha kaba u la kylla long u briew uba riewspah tam ha ka pyrthei, ka la tip shaphang katei ka jingthud la bun snem bad ka la lah ban tehlakam lane ban pynbeit ïa kane ka jingeh hynrei kam shym la leh satia kumta, kaba la pynlong ïa kane ka samla pule ‘Arts’ kaba dang 19 snem ka rta ban mad ia ka jingiap kaba sangsot ha ka jing ingkhong namar ka jingshyrkhei jong kitei ki thylliej ding kiba la bam-duh ia katei ka kali ha katei ka jingjia.
Watla katta, la ong ba na ka liang jong ka kompeni Tesla, kam shym la jubab mardor ia katei ka jingkylli ban ai jingpynshai halor kaba iadei bad kane ka jingjia.
Ka jingmaham jong ki kyndon aiñ ba thymmai ïa ka Tesla kaba la mudui ha ka ïingbishar ba ha khlieh-duh jong ka Alameda County ka long tang hadien katto- katne taïew ba ki bor pyniaid ki la pynlong ïa ka jingtohkit bniah halor ki jingujor jong ki nongñiah kali Tesla halor ka jingeh jong ka jingkhang katei ka kali. Ka jingtohkit ka long ruh kaba eh bha na ka bynta katei ka kompeni namar ba ka dang ialeh ban pynksan bad ban pynngeit ia ki nong America ba shen ki kali jongka kin sa long kiba bit ban shong khlem da donkam ia u nongñiah lane u ‘Driver’.
La bun ruh kiba ud, ba ka jingkhang jong katei ka jait kali, ka long kaba shitom ban plie bad khamtam eh haba don kino- kino ki jingjia kiba hap ban phet noh na ka kali.
Kane ka jingmudui ka long hadien katto katne kiwei pat kiba la kam ba ki don ki jingeh bapher bapher ha ka jingshngaiñ jong ki kali Tesla. Ha u Nailar, ka ïingbishar jong ka Florida, ka la rai ha ka liang jong ka longiing jong uwei pat u samla pule kolej, uba la iap, une uba la shah pyniap ha ka kali Tesla, kaba la phet rieh bun snem mynshwa, bad la ai ia u, palat $240 million, kum ka jingsiew bai lutksan.
Ka tnat pynïaid kali jong ka ri, kaba la plie ïa ka jingtohkit jong ka halor ki jingkhang ba la khang ha u bnai ba la dep, ka dang peit bniah ïa ki jing ujor jong ki nongñiah kali ba hadien ba ki la mih na ki kali jong ki, kim lah ban plie ïa ki jingkhang ba shadien ban pynmih ïa ki khun jongki bad ha ki katto katne ki khep, ki la hap ban pynpra ïa ka jingkhang ban ioh ban sei ia la ki jong ki khun- ki kti.
