United States, Risaw:
Ka Sorkar U Trump, ha ka Sngi U Blei, ka la pynbna ba ka Chicago ka dei ka jaka thma, kum ka jingpynshisha ban phah shipai pyrshah ïa ka jingkwah jong ki heh sorkar jong ka Democratic, katba u nongbishar, ula khanglad ïa ka White House, ba kan phah shipai sha kawei pat ka nongbah, kaba la pynïaid da ki Democrats.
Ka jingeh kaba nang jur ha ka saiñ hima sima ha kylleng ka ri ka pynlong ïa u President Donald Trump ban pyrshah ïa ki kam runar bad ïa ki nongwan buhai shnong pyrshah ïa ki Democrats kiba pyrshah kiba kynnoh ïa u, ba u la shu shim ïa ka bor ha ka kti lade bad ba u la shu synshar donbor halor kiei- kiei baroh.
Ha kine ki khyndiat sngi ba la leit, u Trump u la ai bor ban phah ïa kumba 300 ngut ki shipai National Guard sha Chicago, ka nongbah kaba wan ba lai ha ka jingheh na kiwei pat ki nongbah jong ka America bad la ong ba u Trump u la leh ïa kane, wat hapdeng ka jingpyrshah jong ki nongïalam ba la jied, kynthup ïa u mayor bad u Lat ka Jylla, u JB Pritzker.
Ka Secretary jong ka tnat ïada ri, ka Kristi Noemm, ka la ïada ïa katei ka rai jong u Trump ha ka Sngi U Blei, da kaba pynpaw ba ka Chicago, ka dei ka madan thma.
Hynrei u Pritzker, haba kren ha ka prokram “State of the Union” jong ka rynsan pathai khubor CNN, u la kynnoh ïa ki nongïalam ka Republican, ba ki thmu ban wanrah jingkulmar bad ki kwah ban pynlong madan thma ïa katei ka nongbah, khnang ba kin lah ban phah kham bun ki shipai.”
Katkum ka jingwad bniah jong ka CBS kaba la pynpaw paidbah ha ka Sngi U Blei, la shem ba 42% ki nong America ki ai jingkyrshan ïa katei ka rai jong ka sorkar u Trump, ban phah ïa ki shipai ka tnat National Guard sha kitei ki nongbah, haba ïa-nujor bad 58% pat kiba pyrshah haba iadei bad kane.
U Trump, uba la ai jingkren ha ki khyndiat sngi ba la dep ban pyndonkam ïa ki shipai na ka bynta ka thma ba sha lyndet, um shym la pyni dak ei-ei ban kynran dien noh na ka jingïakhih ba ratbah jong u.
U paralok ba hajan eh jong u, u Mike Johnson, uba dei u Lamphang jong ka Republican ha ka ïing dorbar jong ka ri, u la pynkynmaw ïa ka jingkren jong u President ha ka Sngi U Blei, ha kaba u la ïathuh ha ka prokram “Meet the Press” jong ka lad pathai khubor NBC, ba ki shipai jong ka tnat National Guard, kiba la buh ha katei ka nongbah Washington, ki la ioh ban ai ïa ka jubab kaba biang haba ïadei bad kane.
Namar la ong ba kiba bun hi ki ju pyrshah ïa ka jingphah shipai jong u Trump sha ki nongbah ba ju don ki jingkulmar lane ba don ki jingïakhih paidbah, ha kaba ki nongïalam ka liang pyrshah, bunsien hi ki ju pyrshah ïa kane ka jingleh jong u Trump bad ong ba u Trump um kheiñ snep ïa la ki jong ki paidbah nong shong shnong namar ha man ba don ki kam, u phah da ki bor pahara bad ki shipai jong ka tnat National Guard.
