Gaza Strip, Risaw:
U nongrahktien ba hakhlieh duh jong ka Hamas, u Khalil El-Hayya, ha ka jingphah ktien pateng Sngi Ba-ar, u la ong ba ka Hamas ka kwah ia ka US ban pyntikna ba ka Israel kan pynkut noh shi syndon ia ka thma lada ka Hamas ka la pyndep ia baroh kaba ka la kular bad ynda ka la pyllait lut noh ia baroh ki briew jong ka Israel kiba ka la rahbor naduh ba sdang jong ka thma.
Namar u la ong ba ka Hamas kam shaniah ïa ka jingthmu kyntur pud jong ka Israel, kam lah ban tip ba lehse tang ha ka shi khyllipmat ka Israel ka lah ban shukor bad ka lah ban leit kurup pynban ia baroh ki bynta jong ka nongbah Gaza, lane ha ka por ba ka Hamas ka la pyndem hok ialade, ka Israel ka lah ban ñion kynsan jraiñ bad kan long kaei- kaei ka bym sngewtynnad namar kiwei ruh ki ri kiba kyrshan ia ka Hamas, kin sa leit ban thombor ia ka Hamas ha ka por ba ka la pyndem lut wat ia ki tiar ïakhun jongka, kumba la kular da ka US ba ka Hamas ka dei ban pynduh noh ia ki tiar ïakhun jongka, lada ka kwah ia ka jingiasuk bad ka Israel bad ba ka Israel ruh kan pyllait noh ia ki koidi jong ka Palestine kiba ka la bat naduh mynshwa.
“Ka jingsynshar Israel ha ka histori baroh kawei kam shym la bat ia ki jingkular jongka, bad ngi la mad ia kane la arsien hapdeng ka jingiaid jong kane ka thma. Kumta, ngi kwah ia ki jingkular ba shisha ba ka US kan pyntikna ba kan shim jingkitkhlieh ban pynkohnguh ia ka Israel ba ka dei ban bat ia ka kular kumba la pynbeit bad ba la dep iakut.”
