Mawkyrwat, Risaw 17
Ka Hynñiewtrep Achik National Movement ( HANM), Mawsaw Area Unit ha ka 16 tarik u Risaw, hapoh ka jingïalam u samla Banshan Iawphniaw, President, bad u samla Exlandar Thongni, Secretary, ki la leit jurip ïa ka PHC ha Mawthawpdah.
Ka jingleit jurip jong ka seng ïa katei ka jaka sumar ka dei hadien ba ka seng ka la la ïoh ïa ka jingujor na ki paidbah jong katei ka dong ka thaiñ halor ka jingbym don ki doktor ha ka sngi Saitjaiñ bad ka Sngi U Blei.
Ka seng ha kane ka sngi ka la ïoh ruh ban leit ïakynduh ïa u doktor ba dei peit bad ha ka jingïakren, u doktor u la ïathuh ba ha kane ka jaka sumar don tang iwei i doktor MBBS bad iwei i doktor Ayush bad ka shem jingeh shibun ïa ki ban ai jingshakri ïa ki paidbah.
Kumta ka seng HANM Mawsaw Area Unit ka dawa na ka Sorkar ba ka dei ban phah doktor MBBS biang sa iwei ne 2 ngut ha kane ka jaka sumar khnang ba kane ka jaka sumar kan long shisha ka jaka sumar kaba ai jingmyntoi ïa ki paidbah nongshah sumar.
