Washington, Risaw:
Ka sorkar jong u Trump, ka dang wad ïa ki jingiateh ba kongsan ha kaba ïa dei bad ka kam khaïi umphniang bad ka Russia, katba ka dang thaw lad ban pynkut noh ïa ka thma ha Ukraine, ong ka khubor jong ka Financial Times.
Ka jingiakren hapdeng ka America bad ka Russia kan kynthup ïa ka jinglah ban wanphai biang ki kompeni America sha ka kam shna umphniang jong ka Russia ynda la kut ka jingialeh. Ki jingtyrwa ki kynthup ruh ïa ka jingsdang biang ïa ka jingdie umphniang jong ka Russia sha Europe bad ka jingiatreilang kaba thymmai ha kiwei pat ki karkhana.
Kitei ki jingthmu ba la iathuh, ki dei sa kawei pat ka jingpyrshang jong U Donald Trump, President ka US, ban pynkohnguh ïa U President Russia, U Vladimir Putin, ba un ailad ha ka jingiakren iasuk, mynta ba katei ka thma, ka la rung sha ka snem kaba phra.
Hynrei ka jingkyrmen ban pynthymmai ïa ka jingïadei ha ka liang ka ioh ka kot bad ka Moscow ka lah ban pynjur ïa ka jingïakynad bad ka Ukraine, kaba ka jingïadei jong ka bad ka White House ka la nang sniew namar ka jingbteng jong ka Kyiv ban thombor ïa ki lad pynmih bor ding jong ka Russia.
