Shillong, Risaw 17
Ka jingïalang ‘Annual Conference’ jong ka Meghalaya Civil Service Officers’ Association (MCSOA) ka la long ha ka Sngi Thohdieng ha State Convention Centre, Shillong, ha kaba u Myntri Rangbah ka Jylla, u Conrad K. Sangma u la long kum u Kongsan.
Ha ka jingkren jong u, u Myntri Rangbah u la ïaroh ïa ki ophisar MCS na ka bynta ka jingaiti lut jong ki kumjuh ban pynskhem biang ïa ka jingangnud jong ka Sorkar ban pynkhlaiñ ïa ka rukom pynïaid kam ha ka Jylla.
“Ha kaba kut jong ka sngi, baroh ngi trei na ka bynta kajuh ka thong – ban shakri ïa ki paidbah jong ka Jylla jong ngi. Ym don kano-kano ka kam, kano-kano ka mat treikam, bad kano-kano ka rai kaba don jingmut lymda ngi pynkynmaw ïalade ba ka jingthmu jong ngi ka long ban wanrah ïa ka jingkylla kaba bha ha ka jingim jong ki briew,” u la ong.
U la kyntu ruh ïa ki ophisar ba kin ïai bteng ha ka ban shah ïalam ha ka jingthmu bad ka jingshakri, da kaba ong, “Ki kyrdan kin kylla, hynrei ka jingthmu ka dei ban neh beit.”
Da kaba ban jur halor ka jingsdang bad ka jingsngewrit ha ka synshar-khadar, u la bynrap, “Ka India kan sdang shisha ban kylla ynda ki ‘riew saiñ pyrthei ki nang ban ong ’em’ bad ki ophisar ki nang ban ong ‘hooid’.”
U Myntri Rangbah u la kdew ruh ïa ki jingpynkylla kiba dang ïaid shakhmat, kynthup ban thaw kyrpang ïa ka ‘Meghalaya Cadre’ na ka bynta ki IAS.
“Nga la buddien ban thaw noh la ka jong ïa ka ‘Meghalaya Cadre’ naduh u snem 2019, bad nga kyrmen ba kane shen kan sa urlong. Ki jingpynkylla na ka bynta ka MCS ki long kiba kongsan, kumba ki long na ka bynta kiwei pat ki kam shakri,” u la pynpaw.
Haba pynpaw ïa ka jingkyrmen halor ka jingnang kiew jong ka Meghalaya, u la ïasam ba ka Jylla mynta ka dei kaba ar – kaba kiew sted tam ha ka ïoh ka kot ha India, kaba ïoh ïa ka jingkiew kaba palat 10% bad la khmih lynti ba kan poi sha ka 12-14% ha ki snem ban wan.
“Kata ka khana jong ka jingroi ka dei jong ngi baroh,” u la bynrap.
U Bah Cyril V. Diengdoh, Commissioner & Secretary ka Sorkar Jylla haba ai jingkren ha kane ka sngi u la ïaroh ïa ka jingaiti lut jong ki ophisar MCS bad ïa ka bynta ba kongsan jong ki ha ka synshar-khadar.
U la kdew ba ki ophisar ki shakri ha ka bynta ba hakhmat eh jong ka jingpynïaid kam ha ki kyrdan kum ki Sub-Divisional Officer, ki Block Development Officer, ki Additional Deputy Commissioner bad ki Secretary.
U la pyntikna ba ka Sorkar ka thmu ban pynbha ïa ki jingdonkam, kynthup ïa ki ïingsah ha Shillong bad pynshai ïa ki mat ha kaba ïadei bad ki jingkiew kyrdan sha ki ‘IAS Cadre’, da kaba pynpaw ba la phah ïa ki jingpyntip sha ka UPSC bad ka DoPT ban pynlong ïa ki jingkiew kyrdan man la ka ar snem.
U la pynpaw shuh-shuh ïa ka jingïaid shakhmat jong ka Sorkar ha ka ban pyntikna ïa ka jingthung ophisar MCS man ka por bad ïasam ruh ïa ki jingtip ba bniah shaphang ki prokram ai jinghikai, kynthup ïa ka jingpynrung sha ki jingai jinghikai kam shabar ri bad ka jinghikai ‘Mid-Career’ ka ban sa wan na ka bynta ki ophisar kiba kynriah sha ki kam ban thaw ïa ki mat treikam.
Na ka liang u Ashish M. Sangma, President ka Meghalaya Civil Service Officers’ Association, haba ai jingkren u la pdiang sngewbha ïa u Myntri Rangbah ka Jylla bad ïaroh ïa ka jingkyrshan kaba ïai bteng jong u. U la pynshlur ïa ki ophisar, khamtam ïa kiba dang thymmai, ban shakri da ka jingsbun, ka jingtbit bad ka jingsngewrit, da kaba ban jur ba ka jingthew bashisha jong ka jingshakri u ophisar ka shong ha ka jingsngewhun jong kito kiba ki shakri.
