Gaza, Naiwieng:
Ki lehnoh Hamas kiba don ha ka thaiñ Rafah hapoh ka nongbah Gaza, ka bynta kaba la shah kurup ha ka Israel, ki la pynpaw ba kin nym aiti noh sha ka Israel ia katei ka bynta ba ki la ju bat baroh shi katta, la ong ka kynhun lehnoh jong katei ka kynhun ha ka Sngi U Blei, da kaba kyntu ia ki nongpyniasuk ban wad ia ka lad ban pynbeit ia ka jingeh kaba buh jingma ia ka jingsangeh thma kaba la neh da ki bnai.
Ki tyllong khubor kiba ïajan bad ki jingpyrshang ban pynïasuk ki la ïathuh ha ki lad pathaikhubor ba kitei ki kynhun jong ka Hamas, ki lah ban pyndem wait noh kum ka jingsiew kylliang ïa ka jingïaid sha kiwei pat ki jaka hapoh ka jingtyrwa kaba la thmu ban wanrah noh ia ka jingiabeit bad ban wanrah noh ia ka jingiasuk.
Ki nongpyniasuk jong ka Egypt ki la tyrwa ba, kum ka jingsiew kylliang ia ka jingiaid lynti kaba suk, ki shipai ka Hamas kiba dang don ha Rafah kin aiti ia ki tiar ialeh jong ki sha Egypt. Kane ka jingpynbna ha ka Sngi U Blei na ka Al-Qassam Brigades, ka la buh jingkitkhlieh ia ka Israel ban ialeh pyrshah ia ki nongialehkai, kiba ka la ong ba ki dang iada ialade.
“U nongshun u dei ban tip ba ka jingmut ban pyndem bad aiti ialade kam don ha ka ‘dictionary’ jong ki Al-Qassam Brigades,” la ong katei ka kynhun.
U nongmihkhmat ba kyrpang jong ka US, u Steve Witkoff, u la ong ba katei ka jingthmu ban iasoi na ka bynta kumba 200 ngut ki nongialeh kan long ka jingtynjuh ia ka rukom treikam kaba kham iar ban pynduh tiar ia ki shipai Hamas ha kylleng ka Gaza. Ki Brigade Al-Qassam kim shym la kren beit halor ka jingïakren kaba dang ïaid shakhmat halor ki nongïaleh ha Rafah hynrei ki pynpaw ba ka jingeh ka lah ban ktah ïa ka jingsangeh thma.
Naduh ba ka jingsangeh thma ba la pynlong da ka US ka la treikam ha Gaza ha ka 10 tarik u Risaw, ka thaiñ Rafah ka la long ka jaka ba la jia ym duna ia ka arsien ka jingthombor ia ki shipai Israel, ia kaba ka Israel ka la kynnoh ba ka dei ka Hamas. Katba, ka Hamas pat ka la kyntait bad ong ba kam shym don kti ne don jingtip eiei halor ka jingleh jong kitei ki kynhun jongka kiba don ha katei ka thaiñ, namar katkum ka jingtip bad jingshim rai jong ka Hamas, ka la bthah ia baroh ki dkhot jongka ba kin kohnguh ia ka jingpyniaid bad jingbthah jongka, ban sangeh noh ia ka jingiakynad bad ban pdiang ia ka jingtyrwa sangeh iasiat ba la lam khmat da ka US. Ka Rafah ka dei ka bynta jong ka thma, kaba shyrkhei tam naduh ba la sdang ka jingsangeh thma, ha kaba 3 ngut ki shipai Israel ki la shah pyniap, kaba la pynlong ia ka Israel ban pynshitom beiñ kaba la pyniap da ki phew ngut ki nong Palestine ha katei ka jingiakynad kaba la mih biang hadien ka jingsangeh thma.
Ha kaba kyrpang, ka Al-Qassam Brigades ka la ong ba kan aiti ia ka met jong u shipai Israel u Hadar Goldin ha Gaza ha ka Sngi U Blei ha ka por 2 baje nohphai sngi. Naduh ba la sangeh iasiat, ka Hamas ka la aiti ia ki met iap jong ki 23 ngut napdeng jong ki 28 ngut ki nongshah rahbor. Ka Hamas ka la ong ba ka jingpynjot ha Gaza ka la pynlong ia ka ban shem jingeh ban wad ia ki met iap jong kito ki nong Israel baroh kiba sahkut ha ka kti jongka baroh shi katta hynrei na ka liang jong ka Israel, ka la kynnoh ba ka Hamas ka la leh khnang ia kine baroh bad ka la shu ieh beiñ ia ki briew jongka.
Ka Israel, ka la pynphai biang noh sha Gaza, ïa ki metïap jong ki 300 ngut ki nong Palestine kiba don ha ka kti jongka naduh hashwa jong ka thma bad haduh ba la ïaid ka thma baroh shi katta.
Ki bor pynïaid ka koit ka khiah jong katei ka thaiñ, ki la ïathuh ha ka Sngi U Blei ba uwei u briew u la kyllon iap ha ka jingleit hiar thma jong ka Israel ha Bani Suhaila, kaba don sha ka phang Mihngi jong ka nongbah Khan Younis, kaba don sha ka phang Shathie.
Namar la ong ba ka Hamas, ka la rahbor ia 251 ngut briew na Israel ha ka por ka jingleit hiar thma jong ka ia ka Israel ha ka 7 tarik u Risaw bad kaba la wanrah ruh ia ka jingiap jong palat 1,200 ngut ki nong Israel ha katei ka por., katkum ka jingbuh jingkheiñ kyllum jong ka Israel. Kumjuh ruh pat la ong ba ka jingleit hiar thma bad ka kput jong ka Israel ia ka Gaza hadien kane, ka la wanrah ia ka jingiap jong palat 69,000 ngut ki nong Palestine, katkum ka jingbuh jingkheiñ jong ka tnat ka koit- ka khiah jong ka Gaza.
