Lebanon, Naiwieng:
Ka Hezbollah, ha ka Sngi Nyngkong ka la leh burom khatduh ia ka met ba sah jong u heh nongialam ba ha khlieh duh jong ka bad kiwei pat ki dkhot jong katei ka kynhun lehnoh, tang shi sngi hadien ka jinghiar thma ba shyrkhei jong ki Israel ha ka thaiñ Shathie jong ka Beirut, katba ki Revolutionary Guards jong ka Iran, ki la byrngem ba kin siew kylliang bad pyni da ka bor ia ka jingleh don bor jong ka Israel.
U Haytham Ali Tabatabai u dei u heh shipai ba rangbah tam na ka kynhun ba la kyrshan da ka Iran ban shah pyniap ha ka Israel naduh ka jingsangeh thma ha u Naiwieng 2024 kaba la thmu ban pynkut noh ïa ka jingiakynad kaba la neh palat shi snem hapdeng kine ki arliang mamla.
Kane ka jinghiar thma jong ka Israel ha ka Sngi U Blei ka la long ha ka por ba ka Israel ka la nang pynjur shuh shuh ïa ki jinghiar thma jongka pyrshah ïa ka Lebanon bad ka Washington ka la nang pynjur shuh shuh ïa ka jingpynbor ïa ka sorkar ban pynduh noh ia ki tiar ïakhun jong katei ka kynhun bad ban pynkut noh ïa ki tyllong ba ju pynmih pisa jongka.
Ka Iran ka la pynrem ia ka Israel halor ka jingpynïap ïa u Tabatabai bad ong ba kane ka jingleh jong ka Israel ka long ka “jingleh riewkhlaw” katba ki kynhun shipai ka Islamic Revolutionary Guard Corps jong ka Iran, ki la ong ba ka Hezbollah kan siew kylliang da ka snam ïa ka snam jong ki shipai ba shlur jong ka jaitbynriew Islam.
Da ki spah ngut ki nongkyrshan, ki la iadon bynta lang ha katei ka jingleit ontep ha ka Sngi Nyngkong, ha ki jaka ba bun briew ha ka thaiñ Shathie jong ka Beirut, ha kaba ka Hezbollah, ka bat ia ka bor, na ka bynta u Tabatabai bad 2 ngut ki paralok jong u bad la tap ia ki synduk jongki, da ki lama rong stem jong katei ka kynhun.
Ki paidbah ki la pyrta ia ki kyntien pynrem pyrshah ïa ka Israel bad ka America, katba ki nongkyrshan ki la rah ïa ki dur jong ki nongïalam jong katei ka kynhun bad ïa u nongïalam ba ha khlieh duh jong ka Iran, u Ayatollah Ali Khamenei.
Ka tnat kam bar ri jong ka France bad u nongaiktien jong u heh ka UN, u Antonio Guterres, ki la pynpaw ia ka jingsngewkhia halor katei ka jingiakhih bad kyntu ban pyrkhing, ha kaba u Stephane Dujarric jong ka UN, u la pynkynmaw ia ki seng ba ki riew paidbah bad ki jaka riew paidbah, kim dei ban shah thombor.
