Washington, Naiwieng:
Ka jingshah siat iap ki nongap pahara ka tnat ‘National Guard’ jong ka US ha ka sngi ba la leit, ka la pynkynmaw biang ia ka jingleh jong u President katei ka ri, u Donald Trump, ba ka long kaba kongsan ban buh da ki shipai ban tehlakam ia ki jingma bad jingmynsaw bad ki jingjia ba shyrkhei kiba ju jia ha katei ka nongbah na ka por- sha ka por.
Ka jingpynpoi shipai, kum kiwei pat kiba la hukum da u Trump, ka la shah tuklar ha ka iingbishar bad la rai pynrem ba ka long kaba be-aiñ, hynrei ka rai kaba khanglad ïa ka jingdon jong ki shipai, kam pat treikam bad ka dang lah ban pynkylla noh hadien ka jing ujor.
U Trump u la hukum ïa ki shipai ban leit sha Washington ha u Nailar, da kaba kam ba ka dei ka “jinglehraiñ kaba jakhlia bad kaba dap da ki kam runar,” watla ki jingkheiñ jong ki pulit trai ri ki pyni ba ki kam runar kiba shyrkhei ki la hiar ha katei ka nongbah hadien ba u Trump u la phah da ki shipai ban ap pahara ia katei ka nongbah baroh kawei.
Ka jingphah jong u Trump ia kitei ki bor pahara sha Washington, ka la bud sa kawei pat ha Los Angeles, California ha kaba sdang jong une u snem bad ka la long hashwa jong kawei ka jingjia kaba la jia teng hapoh Memphis jong ka nongbah Tennessee.
Ki nongbah ha kiba u Trump u la buh ïa ki shipai baroh ki dei kiba la ïalam da ki Democrats, hynrei u President u la kyntait ïa ki jingkynnoh ba u thmu tyngeh ïa ki jaka ba la pynïaid da ki nongïaleh pyrshah saiñ hima sima jong u.
Ka kynhun shipai jong ka Washington ka dei ka jingkhleh lang jong ki shipai pahara ri jong ka DC, kiba long tang khyndiat eh na ka shiteng na ka jingdon baroh bad ki shipai na ki hynriew tylli ki jylla ba la ialam da ki Republican.
Mynta ki don palat 2,100 ngut ki shipai ha ka nongbah jong ka America bad u Myntri ka tnat kam poh ïing jong ka US, u Pete Hegseth, u la ong ba un sa kyntiew ia katei ka jingdon da 500 ngut hadien katei ka jingshah siat.
