Washington, Nohprah:
U nongbishar jong ka US, u la rai pynrem ïa uwei u nong India da kaba rai set patok ia u haduh 90 bnai kynthih na ka bynta ka jingdon bynta jong u ha ka jingthmu thok-shukor kaba la thmu ïa ki nongshong shnong kiba la tymmen ha kylleng ki phra tylli ki jylla jong ka Midwestern bad kaba la wanrah ïa ka jingduhnong kaba la thmu palat ïa ka $2.2 million.
U Ligneshkumar H Patel, 38 snem ka rta, u la phla ba u la donkti ha kawei ka jingkynnoh kaba dei ka jingthmu ban leh thok da ki wire bad ka kam thok ha ki tnat kynshew pisa ba lamler bad ar tylli kiwei de ki kam thok. Kumta ka ïing kashari ka la hukum ia u ban siew palat $2 million kum ka jingsiew bai lutksan, la ong ka tnat jong ka aiñ.
“Ki kam leh thok pisa ki dei ki buit thok jong ki riew shim kabu kiba ju pyndonkam ïa ki rukom pynbiej ba ha rukom ban ioh bam ei ïa ka pisa jong ki paidbah ba lui-lui bad ki bym poi pyrkhat,” ong u nongïasaid aiñ jong ka US, u Steven D Weinhoeft.
Ha ki jingkren kiba batai shaphang kane ka skhim, ki nongmudui ki la ong ba u Patel bad ki paralok jong u ki la pynlong kum ki bor pynjari aiñ ne ki heh sorkar pdeng “ban thok ïa ki briew ban ai pisa ïa ki, ban ïoh rung sha ki jingkheiñ pisa ne kiwei kiwei ki jingtip ba kyrpang.” Ki la pynbiej ia kitei kiba la ngat, ba ki donkam ban aiti noh ia ki mar ki mata jong ki na ka bynta ka jingïada bad ka jingshngaiñ jong ka lawei jongki.
Kat kum ki jingthoh jong ka ïingbishar, u Patel u la leit dalade sha ki ïing jong ym duna ïa ka 11 ngut ki tymmen kiba la shah pynngop ha u naduh ka nongbah Illinois, Missouri, Iowa, Michigan bad kumjuh ruh ha Wisconsin, ha kaba u la lum ïa ka pisa bad ka ksiar lane ki jingdon- jingem jongki kiba la kot ia ka $2,231,216.99. Ki nongmudui ki la ong ba u la treikam hapoh ka jingthmu kaba khraw kaba kynthup ïa ym duna ïa ka 85 ngut ki nongshah leh thok.
“Kane ka mukotduma ka pynpaw ïa ka jingma kaba khraw na ka bynta ki riew shimet kiba shim kabu bad pynbiej ïa ki tymmen lyngba ki buit thok kiba shyrkhei,” ong u Matthew J Scarpino, u ASgent ba kyrpang ba dei khmih ïa ka HSI Chicago.
Ki jingshah pynngat ha ki kam thok jong ki tymmen ki la kiew bha ha kine ki snem ba la dep ha ka ri America, ha kaba ki tnat sorkar pdeng ki la pynjur ïa ki jingpyrshang ban ïakhun pyrshah ïa ki kam thok shabar pud kiba ju ïadei bad ki network jong ki ri ka pyrthei.
Ki nongshah mudui kiba wan na India ki la mih ha ki katto katne ki mukotduma kiba kum kine, katba ki bor synshar ha baroh ar tylli ki ri ki pynïar ïa ka jingïatreilang ha ka jingtohkit ïa ki kam runar ha ka kam thok online bad ha ka liang ka pisa tyngka.
