New Delhi, Nohprah:
Ka India ha ka Sngi Balang, ka la pynrem ia ka Pakistan halor ki jingeh kiba wan mih ha Afghanistan ha kane ka por. Ha ka jingialang jong ka United Nations Security Council (UNSC) kaba la long hapoh ka nongbah New York, u nongmihkhmat ba pura jong ka India- u Harish Parvathaneni u la ong ba ka India ka la ban jur ïa ka jingsngewkhia jong ka United Nations Assistance Mission in Afghanistan (UNAMA) halor ki jingleit thombor ki liengsuiñ bad ka la pynrem ïa ka jingpynïap ïa ki kynthei, ki khynnah bad ki nongïalehkai kriket kiba khlem pop ha Afghanistan.
Haba kynthoh pyrshah ïa ka Pakistan, u Parvathaneni u la ong, “Ngi ïohi ruh da ka jingsngewkhia kaba jur ïa ka jingjur ki kam thombor jong ki lehnoh ha ki liang baroh” ba ki paidbah jong ka Afghanistan ki shah pynshitom ha ka jingkhang dam ïa ka lynti ban rung sha ka ri kaba la khanglad ïa ka duriaw ha kaba ki briew jong ka ki la mad ïa ki jingeh kiba pyntlot la bun snem.”
“Kine ki kam ki long ki jingleh pynkheiñ ïa ki kyndon bad ki aiñ ka WTO. Kum kine ki jingbyrngem bad ki kam thombor kiba paw pyrshah ïa ka jaitbynriew LLDC kaba tlot bad kaba rit paid, ki long ka jingpynkheiñ kaba paw pyrthei ïa ka aiñ jong ka UN bad ïa ka aiñ pyrthei. La ong utei u heh.
