California, Nohprah:
Ki bor pyniaid ka nongbah California, ha ka Sngi Nyngkong, ki la pyntip ba ki la lap ia ka jingthmu jong kitei ki suba don kti ban leit buh bom sha ki katto katne tylli ki bynta jong ki kompeni khaïi ka US ha ka sngi peit miet snem thymmai, kaba la jia hapoh South California hadien ba la ioh ban kem noh ia ki katto katne ngut ki dkhot jong ka kynhun runar bad ka kynhun pyrshah sorkar.
Kumta, la ong ba ki pulit ki la ioh kem noh ia 4 ngut ki suba don kti ha ka Sngi Thohdieng, ba la ioh kem ia ki na ka thaiñ shyiap Mojave Desert kaba don sha ka phang Mihngi jong ka nongbah Los Angeles, katba ki dang ia pynbeit bad pynkhreh ban leit buh bom kumba ki la dep thmu. Katkum ka video ba la ioh ring na ki CCTV ba la pyndait ha kitei ki thaiñ, la iohi ia kitei ki 4 ngut kiba dang pynkynriah ia kawei ka tiar kaba heh bad kaba rong iong bad ki leit buh pat sha kawei ka miej kaba don ha katei ka jaka shyiap. Hynrei ki bor pyniaid ki la lap bad iohi noh bad ki la ioh kem noh ruh ia kitei kiba don kti baroh, hashwa ba katei ka jingthmu jongki kan urlong ne treikam.
Ha katei ka ejahar, kitei ki saw ngut kiba la shah kynnoh, ki long ka Audrey Illeene Carroll, 30 snem ka rta; U Sakhari Aaron, 32 snem ka rta; U Dante, 24 snem ka rta; bad ka Tina Lai, 41. Kitei baroh ki dei na ka thain Los Angeles, ong u bah Essayli.
Ki heh sorkar kim shym la batai ia ka jingthmu hynrei ki la ong ba ki dei ki dkhot jong ka tnat jong ka kynhun kaba la ai kyrteng ka Turtle Island Liberation Front. Ka kynhun ka khot ia ka jingpynduh ia ka jingsynshar phareng, ka jingsynshar jong ki jaitbynriew bad “ki nongtrei ban kiew bad ban ialeh pyrshah ia ka jingsynshar khadar,” katkum ka jingujor jong ki nongleh kam sniew.
Ia ka kyntien “Turtle Island” la pyndonkam da ki katto katne ki jaitbynriew trai ri trai muluk ban batai ia ka North America ha ka rukom kaba pynpaw ia ka jingdon jong ka shabar jong ki pud jong ka jingsynshar phareng ba la buh da ka US bad Canada. Ka wan na ki khanatang jingthaw jong ki trai ri trai muluk ha kaba la thaw ia ka dewbah halor ka tyrpeng jong u blang heh.
Ki heh sorkar ki la lap ruh ïa ki kot lyngkdop “Free Palestine” ha ka jaka shong camp ha ri khlaw ha kaba ki suba donkti ki dang trei bad ki tiar shna bom.
Ki jingshah kynnoh pyrshah ia uwei pa uwei u nongshah kynnoh ki kynthup ia ka jingthmu bad ka jingdon ia ka tiar pynjot. U Essayli u la ong ba la khmih lynti ban pynngat shuh shuh ha ki taiew ban wan.
Ki nongiasaid ain jong ki saw ngut ki suba kim shym la jubab mardor ia ki jingkyrpad ban ioh jingtip, bad ka Associated Press kam shym la lah ban iakynduh ia kiba ha iing. Ka AP ka la phah ruh ia ki khubor sha ki social media account jong ka Turtle Island Liberation Front ban pan jingkynthoh hynrei kam shym la ioh jubab eiei.
