Shillong, Ïaïong 14
Ka SCA ‘A’ Academy bad ka Sunrise Academy ki la khur jingjop ha kaba sdang ïa ka Inter School Under-15 Cricket Tourna-ment 2026 ba la pynïaid da ka Shillong Cricket Association ha ka sngi Ba-ar ha madan Urkaliar, Shillong.
Ha kane ka jingïakhun ka SCA ka la pynliem noh ïa ka B.K Bajoria da 9 wiket. Ka B.K Bajoria kaba la shimti ban tied nyngkong ka la kamai 105 run bad shah pynhap 7 wiket ha ki 15 over. U Samarth Kumar Pathak u la khyrwit ïa ka shiteng spah kaba 53 run na ki 44 bol bad u Abishek Das u la ïoh 14 run na ki 18 bol. Katba u Devansh Deb bad u Ashwin Shah ki la khur mar 2 wiket na ka bynta ka SCA.
Haba wan shimti ïa ka pali kaba ar, ka SCA ka la lah ban kynjoh sha ka thong da kaba kamai 108 run bad shah pynhap 1 wiket ha ki 9.5 over. U Devansh Deb u la tied 45 run na ki 31 bol bad u Jagrit Thakur u la ïoh 22 run na ki 11 bol. Katba u Abishek Das u la khur 1 wiket na ka bynta ka B.K Bajoria. Ïa ka nam Player of the Match la khur da u Devansh Deb.
Haba phai sha kawei pat ka jingïakhun, ka Sunrise Academy ka la jop da 81 run ïa ka St. George School. Ka Sunrise Academy ka la kamai 172 run bad shah pynkhyllem baroh ki nongtied ha ki 19.2 over. U Aditya singh u la tied 58 run na ki 23 bol bad u Numan Ahmed u la ïoh 18 run na ki 16 bol. Katba u Timber Marak bad u Vihan ki la khur mar 2 wiket na ka bynta ka St. George.
Haba wan beh ïa ka thong, ka St. George ka la kami tang 91 run hadien ba ka la shah pynkhyllem baroh ki nongtied ha ki 14 over. U Piyush Sharma u la tied 16 run na ki 15 bol bad u Sammarth u la ïoh 14 run na ki 9 bol. Katba u Aditya Shingh u la khur 4 wiket bad ïa ki 3 wiket la khur da u Arman Shingh na ka bynta ka Sunrise Academy. Ïa ka nam Player of the Match la khur da u Aditya Singh.
