Shillong, Ïaïong 14
Ka 5th Meghalaya State League (MSL 5) kan sdang ha ka sngi Balang ha SSA Stadium, Polo ha kaba ka Nongkseh kaba long ka lahduh jong ka Champions Cup 2025, kan ïakhun pyrshah ïa ka Khimusniang SC ha ka por 5 baje janmiet.
Ïa kane ka lympung ka ban pynïaid da ka Meghalaya Football Association (MFA) ha ryngkat ka jingkyrshan da ka tnat ïalehkai ka Sorkar Jylla, yn wan ban plie da u Myntri ba dei khmih ïa ka tnat Sports & Youth Affairs u Bah Wailadmiki Shylla kum u kongsan.
Nalor ka Nongkseh SSCC (Shillong Sports Association) bad ka Khimusniang SC (West Jaintia District SA), kiwei pat ki kynhun kiba don ha ka Group-A ki long ka Mawshun SCC (Riwar Mihngi Football Association) bad ka Umkaber SCC (Tyrsad Area SA)
Kumba ka paw ka Nongkseh ka dei kawei na ki klob kaba la sdang bha ba kan khring ïa ki khmat jong ki paidbah nongpeitkai, hadien ka jinglah ban paw bad ban ïalehkai bha ha ka samoi ïalehkai u snem 2025, da kaba ka la rah ïa ka nam lahduh First Division bad hadien pat ïa ka Champions Cup ba la pynlong da ka Shillong Sports Association nalor kiwei pat kiba ka la jop ha ka 11th All India Chief Minister’s Gold Cup International Football Tournament kaba la long ha u Kyllalyngkot mynta u snem ha Sikkim.
Ka Nongkseh ka la kiew kyrdan sha ka Shillong Premier League (SPL) ha kaba kan pynkhreh ban ïashim bynta mynta u snem.
Ha kawei pat ka liang ka Khimusniang ka dei ka kynhun kaba la pyrshang ba kan ïoh ïa ka jingsdang kaba paka ha kane ka lympung. Ha ka aïom ba la lah, ka la rah ïa ka nam lahduh ha ka Super Division na ka bynta U Kiang Nangbah Memorial Trophy ba la pynlong da ka West Jaiñtia District Sports Association.
Kumba ka paw kane ka lympung ïalehkai MSL ka long ka jingplie lad ïa ki kynhun ïalehkai ba kynsai na ki synjuk kiba la pynïasoh sha ka MFA ba kin ïoh ka lad ban pyni ïa ki sap ïalehkai na ka bynta ban rai ïa ka nam lahduh.
Kane ka lympung ka plie lad ruh ïa ki klob kiba don jingthmu ban leit shim bynta sha ka I-League 3 ban pynlong da ka All India Football Federation (AIFF).
