Shillong, Ïaïong 16
Ka lympung ïalehkai Inter School Under-15 Cricket Tournament ba la pynlong da ka Shillong Cricket Association ka la nangjam shaphrang ha kaba ka BK Bajoria bad ka Sunrise Academy ki la khur jingjop ha ka sngi Palei.
Ha kane ka jingïakhun, ka BK Bajoria ka la pynliem noh ïa ka Holly Cross Secondary School da 49 run. Ka BK Bajoria kaba la kam trai ban tied nyngkong, ka la kamai 140 run bad shah pynhap 8 wiket ha ki 20 over. U Abhisek Das u la tied 42 run na ki 34 bol bad u Aryan Sunar u la ïoh 26 run na ki 30 bol. Katba u Akash Kumar u la khur 3 wiket bad ïa ki 2 wiket la khur da u Niraj Rai.
Haba wan beh ïa ka thong, ka Holly Cross ka la kamai tang 91 run hadien ba ka la shah pynkhyllem baroh ki nongtied ha ki 13.3 over. U Ayush kr Roy u la tied 22 run na ki 20 bol. U Samarth Pathak u la khur 3 wiket bad ïa ki 2 wiket la khur da u Abhisek Das. Ïa ka nam Player of the Match la khur da u Samarth Pathak.
Haba phai sha kawei pat ka jingïakhun kaba ar, ka Sunrise Academy ka la jop da 55 run ïa ka Nongthymmai Academy. Ka Sunrise Academy kaba la tied nyngkong, ka la kamai 248 run bad shah pynhap 4 wiket ha ki 20 over. Kane la wan lyngba ka jingïalehkai bha u Harsh Singh uba la tied 126 run na ki 63 bol bad u Aditya Singh u la ïoh 72 run na ki 30 bol. Katba u Rohan Sunar u la khur 1 wiket.
Haba wan beh ïa ka thong, ka Nongthymmai Academy ka la kamai tang 193 run bad shah pynhap 4 wiket ha ki 20 over. U Hetrath Singh u la tied 82 run na ki 50 bol bad u Raunak Das u la ïoh 34 run na ki 32 bol. Katba u Numan Ahmed u la khur 2 wiket bad ïa ka 1 wiket la khur da u Aditya Singh. Ïa ka nam Player of the Match la khur da u Harsh Singh.
