Shillong, Ïaïong 16
Ka Nangkiew Irat SC ka la sdang da ka jingjop ha ka 5th Megha-laya State League ba la pynlong da ka Meghalaya Football Association (MFA) hadien ba ka la lah ban pynjem khnap haduh 9-0 kol ïa ka Mulang SC Nongbah ha ka jingïakhun jong ka Group-B ha ka sngi Palei ha madan MFA Turf, Third Ground, Polo.
Ha ka kylla step ka Nangkiew Irat ka la thep 3 kol bad ka la bynrap biang sa shiteng dorjon ha ka kylla miet ha kaba ka Mulang Nongbah ka la shem jingeh ban pynphai bad u Dawanlangki Susngi u la shah beh na madan hadien ba u la ïohpdiang da ar tylli ki yellow card.
Ïa ki kol kiba ka Nangkiew ka la thep ki long u Sangti Janai Shianglong (12′, 56′), Banshan-lang Nongdhar (21′, 85′), Broling-ton Warlarpih (26′), Dibinroy Nongspung (57′, 88′) bad u Restom Khriam (90′).
Ka lahduh ha ka MSL ba la lah, ka Mawlai SC ka la jop da 3-1 kol pyrshah ïa ka Amlarem SC ha ka jingïalehkai jong ka Group-C, katba ka Maram FC ka la jop da 3-2 kol ïa ka A’chik SCO Rongjeng ha ka Group-G. Ïa kine ki jingïakhun la pynlong ha Amlarem bad ha Williamnagar.
Katba ka lahduh ha ka MSL 2023, ka Rangdajied United FC ka la pynliem noh ïa ka Mawten SC da 2-1 kol ha Mawkyrwat.
Ha kane ka jingïalehkai jong ka Group-H ka Mawten SC ka la ïoh ban pynkhih jar lyngba u Wellberjune Lyngdoh (45′). Hynrei dei ha ka minit kaba 69 jong ka kylla miet ba ka Rangdajied ka la lah ban pynïakhaid kylla lyngba u Firstborn Roy Khongsti. Ha RUFA ka la lah ban pynurlong ïa ka jingjop hadien ba ka la thep biang ïa ka kol kaba khatduh lyngba u Freelyson Tariang (81′).
Ha ka Group-A kaba la long ha Shillong, ka Umkaber SCC ka la jop da 3-2 kol ïa ka Mawshun SCC ha SSA Stadium.
Ka Mawshun ka la ïoh ban pynkhih jar nyngkong lyngba u Niki Khonglam (16′) hynrei u Pynshaibor Kharbteng (37′, 46′) u la lah ban pynphai kylla ar kol hashwa ban kut ka kylla step na ka bynta ka Umkaber.
Hadien katto katne por ba la bteng ïa ka kylla miet, u Bradley Masynting (72′) u la lah ban pynïakhaid na ka bynta ka Mawshun hashwa ba ka Umkaber kan pynurlong ïa ka jingjop lyngba u Toberwel Marngar (90’+1).
Haba phai sha ka jingïalehkai jong ka Group-E ha Wahïajer, ka lahduh ha ka MSL 2019 ka Shillong Lajong FC ka la pynliem noh ïa ka Lumphyrnai Sohphoh FC da 3-0 kol. Kane ka la wan urlong lyngba u Samchaphrang Lato (51′), Riborlang L Lyngkhoi (57′) bad u Banlamkupar Rynjah (81′) na ka bynta ban khur ïa ki 3 poiñ.
Ha ka jingïalehkai jong ka Group-D ha Khliehriat, ar tylli ki kynhun ba khlaiñ bor na Jaiñtia Hills, ha kaba ka Thangskai Tiger SC ka la jop da ka said ïa ka Ladthadlaboh SC lyngba ka shi kol ba la thep da u kapten u Phermedaki Syrti (68).
