Shillong, Ïaïong 17
Ka Aston Villa bad ka Nottingham Forest ki la jam sha ka semi final ha ka Europa League hadien ba ki la lah ban khur jingjop ha ka quarter-final kaba la long ha ka sngi Thohdieng.
Ha kane ka jingïakhun ka Villa ka la pynliem noh ïa ka Bologna da 4-0 kol ha Villa Park na ka bynta ban tam da 7-1 ha ka ‘aggregate’, katba ka Forest ka la jop da 1-0 kol ïa ka FC Porto na ka bynta ban tam da 2-1 ha ka ‘aggregate’.
Hapoh ka jingïalam u Unai Emery, ka Aston Villa sa shisien pat ka la paw biang ha kane ka lympung ha kaba ka la ïoh ban pynkhih jar nyngkong ha ka minit kaba 16 lyngba u Ollie Watkins, uba la kynjoh sa ki 100 kol kiba u la thep na ka bynta kane ka klob. Watla u Morgan Rogers u la pynlehnohei ïa ka penalty, pynban ka Villa kam shym la kynran dien ha kaba u Emiliano Buendia (26) bad u Rogers (39) hashwa ban kut ka kylla step hashwa ba u Ezri Konsa (89) un thep ha ka kylla miet bad ban khur syndon ïa ka jingjop.
Haba phai halor ka jingïalehkai, u kapten ka kynhun u John McGinn u la ong, “Ngi la donkam ban ïoh ïa ka kol kaba nyngkong kaba long kaba kongsan bha. Ki dei ka kynhun kiba don jingma shabar na ïing. Ngi la lah ban ïalehkai bha ha ka kylla step kat haduh ba ngi la ïoh rung sha ka semi-final bad kane ka la pynkmen eh ïa ngi.”
Haba phai sha kawei pat ka jingïalehkai ha City Ground, ka Nottingham Forest ka la shim ïa ka kabu kaba biang hadien ba u rangïalehkai ‘dien ka Porto u Jan Bednarek u la shah sei red card na ka daw ka jingleh thurmur. Te kumta u Morgan Gibbs-White u la ïoh ban pynkhih jar na ka bynta ka Forest ha ka minit kaba 12.
Ka Porto ka dangïai long ka kynhun ka bym lah ban pynurlong watla ka la ïoh ïa ki kabu kiba biang, hynrei ar sien ki la leit dei na diengkol, hynrei ka Forest ka la lah ban pynthikna ban jam sha ka semi-final ha ka sien kaba nyngkong ha Europe naduh ba ka la rung teng ha u snem 1984.
Na ka liang u manager ka Forest, u Vitor Pereira, u la ïaroh ïa ka kynhun jong u, da kaba ong: “Ka klob bad ki nongkyrshan, ki dei hok ban ïoh ïa ka jingjop. Nga ïoh ïa ka kynhun kaba kynsai. Ki don ïa ka mynsiem ïakhun, ka jinglong bad ka jinglah ban ïalehkai.”
Ha kawei pat ka liang, ka SC Freiburg ka la jam sha ka semi final ha ka sien kaba nyngkong ha kane ka lympung hadien ba ka la tam da 6-1 ha ka ‘aggregate’ hadien ka jingjop ïa ka Celta Vigo, katba ka Sporting Braga ka la jop da 4-2 kol ïa ka Real Betis.
Te kumta ka Forest kan ïakynduh pyrshah ïa ka Villa bad ka Braga ïa ka SC Freiburg, ha ka semi final ka wat ba nyngkong ki ban long ha ka 1 tarik u Jymmang, katba ka wat kaba ar kan long ha ka 8 tarik u Jymmang.
