New Delhi, Iaiong:
Katkum ki khubor, la ong ba ka jingsangeh thma ba 10 sngi hapdeng ka Israel bad Lebanon, ka la sdang treikam ha ka Sngi Palei, ha kaba u President ka America- u Donald Trump u la pyntip ba u dang pyrshang ban pyniakynduh ia ki nongialam jong kitei ki 2 tylli ki ri naka bynta ka jingiakren- iapynbeit ban pynkut noh ia ka jingiakynad.
Kane ka jingsangeh thma, kaba u Trump, kan sdang ha ka por shiteng miet ha Lebanon bad Israel , ka wan ha ka por ba ka America, ka dang pynjur ïa ka jingpyrshang ban poi sha ka jingïateh kular ban pynkut noh ïa ka thma bad ka Iran, ha kaba ka Tehran, ka ban jur ba ka jingïakut thma jong ka Lebanon, ka dei ban long shi bynta jong kano kano ka jingïateh kular.
Ka thma Middle East ka la sdang naduh ba ka America bad ka Israel ki la hiar thma ia ka Iran ha ka 28 tarik u Rymphang, bad la tan ia ka Lebanon ha ka por ba ka Hezbollah ka la siat roket ia ka Israel ha ka 2 tarik u Lber.
Naduh katei ka por, ki jinghiar thma jong ka Israel ha Lebanon, ki la pyniap ia palat 2,000ngut ki briew bad ki la shah pynkynriah jaka, katba ki shipai khyndew jong ka Israel, ki la hiar thma ia ka thain shatei jong katei ka ri.
U nongïalam jong ka US u la ong ba kane ka jingïateh kular ban pynsangeh ïa ki jingïaleh pyrshah ka la wan hadien ka jingïakren phone kaba “bha bha” bad u Myntri Rangbahduh jong ka Israel u Benjamin Netanyahu bad u President ka Lebanon u Joseph Aoun.
“Kine ki arngut ki Nongïalam ki la mynjur ba na ka bynta ban ïoh ïa ka JINGSUK hapdeng ki Ri jong ki, kin sdang thikna ïa ka CEASEFIRE kaba 10 Sngi ha ka por 5 P.M. EST,” lane 2100 GMT, ong u Trump ha ka Truth Social network jong u.
Hadien u la ong ba u khmih lynti ba u Netanyahu bad u Aoun kin leit jngoh ia ka White House “ha ki saw ne san sngi ban wan”.
Kan long ka sien kaba nyngkong ba ki nongialam jong ka Israel bad ka Lebanon kin iakynduh.
U nongaiktien jong ka hospital Israel, u iathuh ba lai ngut ki briew, ki la mynsaw ha ka sngi Thohdieng, tang khyndiat por shwa ban sdang ia ka jing ia sangeh thma.
Ka jinghiar thma jong ki Israel ha ka nongbah Ghazieh, kaba don shathie jong ka Lebanon, ka la pyniap ia 7ngut ki briew bad 33ngut ki la mynsaw, ong ka tnad ka koit ka khiah jong ka Lebanon, ha ka sngi Thohdieng.
U Netanyahu u la ong ba ka jingsangeh thma bad ka Lebanon ka la ai ka lad na ka bynta ka “jingiateh jingsuk kaba don ha ka histori” bad ka Beirut — hynrei u la ban jur ba ka jingpynduh tiar ialeh na ka kynhun lehnoh Hezbollah ka dang long ka jingpynbeit lypa.
U Trump u la ong ba ka Hezbollah ka la don lang ha ka jingsangeh thma, hynrei katkum ka jingong jong ka tnad kam pohïing jong ka US ka jingsangeh thma ka la pynlong ïa ka Lebanon hi ban pynpra ïa ka kynhun lehnoh ba la kyrshan da ka Iran.
