Shillong, Ïaïong 19
Ka Mawsawrit SC ka la pynliem noh ïa ka Nongthymmai Neng SC da 7-0 kol na ka bynta ban khur jingjop ha ka lympung ïalehkai Women’s Football League ba la pynïaid da ka Tyrsad Area Sports Association (TASA) ha ka sngi Saitjaiñ.
Ka Jesika Umdor, Ebatti Umdor bad ka Daisha Nongbet ki la ïathep mar ar kol bad ïa kawei pat la thep da ka Dariat Umdor.
Ha kane ka jingïakhun kaba la long ha madan Mawlum Tyrsad, ki ‘thei ïalehkai ka Mawsawrit ki la lah ban ïalehkai bha naduh kaba sdang ha kaba ka Jesika ka la pynkhih jar ha ka minit kaba 5 bad ïa ka kol kaba ar la thep da ka Ebatti (9).
Hadien shiteng kynta kane ka kynhun ka la ïoh ban thep biang sa lai kol lyngba ka Jesika (32), Daisha (36) bad ka Dariat Umdor (38). Ka Ebatti ka la thep biang ïa ka kol kaba ar ha ka minit kaba 42 bad ka Daisha (46) na ka bynta ban khur syndon ïa ka jingjop.
Ha ka jingïalehkai kaba ar ka Wahmawpat SC ka la pynliem noh ïa ka Pomsanngut SC da 1-0 kol bad ïa kane la thep hi da ka nongïalehkai ka Pomsanngut.
Haba phai sha kawei pat ka jingïakhun, ka Lawkhla Mawlong SC ka la jop da 2-0 ïa ka Mawsadang SC. Ïa kine la thep bakla da ka ‘thei ïalehkai ka Mawsadang ha ka minit kaba 35 bad va kawei pat la thep da ka Shibaïaineh Kharnaïor ha ka minit kaba 43 na ka bynta ban khur ïa ka jingjop.
