Johannesburg, ïaïong 18:
Katkum ki khubor la ong ba utei u ‘riewsaiñ pyrthei, uba long ruh u nongïalam la liang pyrshah jong ka South Africa, u Julius Malema, 45 snem ka rta, u la shah rai pynrem haduh 5 snem, hadien ba la lap ba u la donkti ha ka jingdon suloi be-aiñ bad siat ha ki jaka paidbah.
Hynrei u Majistor, u la ailad ïa utei u nongïalam ka Economic Freedom Fighters bad MP ba un ujor pyrshah ïa ka jingpynshitom, kaba mut ba ym shym la rah mardor ïa u sha phatok.
Kham mynshwa, haba u ieng ha iingbishar da ka suit kaba dum bad ka tie kaba saw, u Malema um shym la pyni ia ka jingsngewrit katba u Olivier u dang pule ia ka jingpynshitom wat la ka lawei jong u ha ka sain pyrthei ka don ha ka jingma.
Ha u snem ba la dep, u la shah rai pynrem na ka bynta phra tylli ki kam runar, kynthup ïa ka jingdon suloi be-aiñ, ka jingpynbthei ïa ka ha ki jaka paidbah bad ka jingpynma khlem da pyrkhat.
Lada pynskhem ia ka jingshah pynshitom jong u, u Malema un shah pynduh noh na ka jinglong MP haduh san snem hadien ba u la mih na phatok. Hynrei ka nongpeit bniah ia ka sain pyrthei ka Sandile Swana ka la iathuh ha ka BBC ba ka jingujor ka lah ban shim por katto katne snem kumta une u nongialam ka EFF un lah ban bteng ia ka kam sain pyrthei jong u hapdeng kane ka por.
Kane ka jingkynnoh ka ïadei bad kawei ka jingjia ha u snem 2018 ha kaba ka video ka la mih kaba pyni ïa u Malema ba u siat ïa ka suloi semi-automatic ha suiñ ha ka por ba u dang rakhe ïa ka jingdap phra snem ka party jong u kaba la pynlong ha ka jylla Eastern Cape jong ka ri.
Ha ka jingbishar ha KuGompo City, kaba dei ka kyrteng thymmai jong ka East London, U Malema, u la ïathuh ha ka ïingbishar ba u la siat ïa ki suloi kum ka jingkmen.
U Malema u la long shisien u nongïalam jong ka kynhun samla jong ka African National Congress kaba synshar. Hynrei hadien ba la beh noh ïa u na ka seng, hadien ka jingïakynad bad u President jong katei ka por u Jacob Zuma, u la leit ban thaw ïa ka EFF.
Da ki jingkhot jong u Malema ban kurup ia ki jaka ba dei trai da ki rong lieh bad ki jingkynthoh ba dei ban leh kham bun ban pynkylla ia ka spah sha kiba bun ki rong saw, ka EFF ka la bam ia ka bhah vote jong ka ANC. Ka la kylla long ka seng kaba saw ha ka ri ha ka elekshon 2024.
Hadien ba la lap ba u donkti ha u bnai Lber ba la dep, la kdew ba u Malema u la ong ia kito kiba don shabar jong ka iingbishar ba “ka jingleit sha phatok ne ka jingiap ka dei ka dak burom”.
“Ngim lah ban tieng ia ka phatok [lane] ban iap na ka bynta ka jingkylla. La ki kwah ban leh aiu, ki dei ban tip ba ngin ym kynran dien satia.”
U la byrngem ruh ban shim ïa ka jingpyrshah ïa ka rai haduh ka ïingbishar ba ha khlieh duh jong ka South Africa, ka ïingbishar jong ka riti synshar ka ri.
Ka jingshah pynngat mukotduma jong u Malema, ka la jia ha ka por ba ka kynhun nongïakhih jong ki Afrikaner, ka AfriForum, kaba don ka jingïadei kaba ïaknieh bad u bad ka EFF, ka la plie ïa ka mukotduma pyrshah ïa u Malema, hadien ba katei ka video, ka la saphriang bha.
U Secretary-General jong ka ANC, kaba ialam ia ka sorkar synrop ba don 10 tylli ki seng, ka bym kynthup ia ka EFF, u la pynpaw ia ka jingsngewlem ia U Malema.
