Shillong, Ïaïong 20
U Juha Miettinen, u nong-ñiah kali ba la rim bha, u la khlad noh ha ka jingïatakhuh ki hynñiew tylli ki kali, ha ka por ba ki dangïamareh ha Nurbur -gring jong ka Germany, ha ka sngi Saitjaiñ.
Kane ka jingïamareh kaba la ïashim bynta ruh u Max Verstappen uba la jop saw sien ïa ka Formula One ha ka pyrthei, la pynsangeh noh hadien katei ka jingjia ha kaba ki nongpynïaid ki la pynsangeh noh ïa kane ka jingïamareh kali. Kane ka jingïakop ka la long shi bynta jong ka jingïaknieh rung (qualifier) sha ka Nurburgring Langstrec-ken Series (NLS) kaba 24 kynta ka ban long ha u Jymmang mynta u snem, ha kaba u Verstappen u la thmu ban ïashim bynta.
Ki khubor ki ïathuh ba utei u nongñiah uba na Netherlands um shym la don ha ka jingïamareh lynti, ha ka por ba jia katei ka jingjia hynrei u dei ban ñiah kali, ha ka sngi U Blei.
Katei ka jingjia ïatakhuh kali ka la jia ha ki 25 minit hashwa ban kut ki saw kynta jong ka jingïakop.
U Miettinen, uba la 66 snem ka rta, ula khlad noh hapoh ka jaka sumar, katba 6 ngut kiwei pat ki nongñiah kali, ki dangdon hapdeng ka jingshah sumar hapoh ka jaka sumar.
“Watla ki nongsumar kila poi ha ka por ba biang, hynrei kim shym la lah ban pyllait ïa ka mynsiem u Juha Miettinen hadien ba la lah ban sei ïa u na ka kali kaba u ñiah,” la pynbna ki bor pynïaid hadien ka por janmiet.
“Ki jingpyrkhat jong baroh kiba don bynta ha Nurburgring baroh 24 kynta na ka bynta ka longïing jong u Juha Miettinen.”
Haba pynpaw ha ka jingthoh ha rynsan social media, u Verstappen u la ong ba u la sngew kyndit halor katei ka jingjia bad ka jingïap jong u Miettinen.
“Ka jingïalehkai ñiah kali ka dei kaei kaei kaba ma ngi baroh ngi sngewtynnad eh, hynrei ha ki por kiba kum kine ka long ka jingpynkynmaw haduh katno ka long ka jingma kaba khraw. Te kumta nga phah ïa ka jingsngewlem sha ki bahaïing hasem bad kiba ïeid bathoiñ jong u Juha.”
Kumjuh na ka liang ka synjuk Motorsports ka la pynpaw ïa ka jingsngew-lem ha rynsan social media ha ka miet jong ka sngi Saitjaiñ.
“Ka FIA ka sngewsih ban tip ïa ka jingkhlad noh u Juha Miettinen hadien ka jingjia ha ka jingïamareh kali jong ka ADAC 24h Nurburgring Qualifiers.”
Ha ka jingshisha kane ka jingïakop ka la dei ban bteng ha ka sngi U Blei, ha kaba yn shim bynta lang u Verstappen bad u paralok nongñiah ka Mercedes u Lucas Auer.
