Washington, Iaiong:
U Pope Leo XIV u la ong ha ka sngi Saitjaiñ ba u sngewsih ba ïa ki jingkren ba u la kren kum ka jingkynthoh halor ka jingshah kynthoh na u President Donald Trump, da kaba kyntait ba um don jingthmu ban ïasaid pyrshah ïa u nongïalam jong ka US.
Ka nuksa ka dei ka jingkren shaphang ki “nongsynshar donbor” kiba lute ïa ka pyrthei kaba u la ai ha Cameroon ha ka bynta kaba ar jong ka jingleit jngoh ïa ka Africa, u Leo u la iathuh ha ki nongthoh khubor katba u dang leit sha Angola. Ia kine ki jingkren la thoh bha shwa ba u Trump u “kynthoh halor jong nga bad halor ka khubor jong ka jingsuk kaba nga pynphriang”, u la ong.
“Bad watla katta la shim ba nga pyrshang ban sdang ïa ka jingiakren kaba thymmai bad u President, kaba ngam sngewtynnad satia,” la ong u Leo.
“Kaba bun na kiei kiei kiba la thoh naduh kata ka por ki long kiba kham bun ki jingkynthoh halor ki jingkynthoh kiba pyrshang ban batai ïa kaei kaba la kren,” u la ong.
U Leo ha ka Sngi Palei, u la ïakhun pyrshah ïa ki “nongsynshar donbor” kiba ïalam bakla ïa ka pyrthei katba u dang don ha ka jingleit jngoh kaba heh bha ha ka nongbah Bamenda, kaba don shaphang shatei lam mihngi jong ka Cameroon, kaba dei ka pdeng jong ka jingïaleh pyrshah jong ki nongïapher jaitbynriew, kiba kren phareng, kaba la neh haduh shisnem bad kaba la pynïap ïa ki hajar ngut. Ia katei ka jingkren la batai da ki lad pathai khubor jong ka US khamtam kum ka jingkdew shaphang u Trump.
Hynrei la thoh bha ïa ki shwa ki jingkynthoh jong u Trump, la ong u Leo, da kaba bynrap “ka la don ka jingiathuhkhana kaba khlem long kaba thikna ha baroh ki liang jong ka”. U Trump u la ong ha ka 12 tarik u iaiong ba um dei u nongkyrshan ba radbah jong u Pope Leo, bad u la kynnoh ïa u ba u “lehkai bad ka ri (Iran) kaba kwah ïa ka tiar nuclear”.
Hadien pat u la pynduna arsien ïa ki jingkynthoh jong u sha ki nongthoh khubor da kaba thoh ha ka Truth Social, da kaba ong: “Ngam kwah ïa u Pope uba pyrkhat ba ka long kaba bha ïa ka Iran ban don ïa ki tiar ialeh nuclear.”
“U Pope Leo u long uba tlot halor ki kam runar, bad uba shyrkhei na ka bynta ka Foreign Policy”, la ong u nongïalam jong ka US.
