Bergamo, Iaiong:
Ha kane ka khubor, la ong ba 2 ngut ki nong India ki la shah siat iap ha ka thaiñ Bergamo jong ka ri Italy katba ki dang mih na kawei ka jakamane hapdeng ka jingialum lang jongki naka bynta ka tamasa ‘Vaisakhi’.
Kane ka la jia ha ka Sngi Thohdieng, ha ka por shiteng miet ha khmat jong ka Gudwara, kaba don ha ka thaiñ ba heh iew bad ba dap da ki karkhana.
Kitei ki arngut ki kynthup ïa u Raginder Singh uba 48 snem ka rta, uba long u nongshong shnong jong ka Covo bad uwei pat uba la ju ithuh kum u Gurmit Singh uba la don 48 snem ka rta uba dei na ka shnong Agnadello.
La kynnoh ba utei u nongthombor u la leit sha kitei ki briew, u la siat bad nangta u la phet krad noh da ka kali, la iathuh ka kot khubor.
Katkum ka jinglap ba nyngkong, la kyntait ba ka jingialeh kynsan kaba la nang kiew sha ka jingpynmih snam, la ong ka khubor.
Kumba shiphew tylli ki thliew dak mong kuli la lap na katei ka jaka katba ki bor synshar ki dang tohkit ïa ka jingmut jong ka “jingpyniap ba la thmu lypa”.
La ong ba uwei u nongsakhi ïa katei ka jingjia, u la iathuh ha ki nongthoh khubor ba utei u nongsiat u dei “u nong India” uba ju leit ruh sha katei ka Gurdwara.
Katkum ka jingong jong u juh u nongsakhi, ki kuli ki la bthei ruh ïa u briew uba lai, la ong ka khubor.
Ka jingrakhe kaba thikna na ka bynta ka Vaisakhi la thmu ban pynlong ha ka Sngi Saitjaiñ kaba don hajan ryngkat bad ka jingiashim bynta jong ki jaka treikam jong ka thaiñ.
