Shillong, Ïaïong 21
U rangïalehkai ka Jylla u Klingson Marak u la don hapoh ka thup jong ka kynhun ïalehkai phutbol ka ri India na ka bynta ka lympung ïalehkai IBSA Asian Men’s Blind Football Championship 2026, kaba la sdang ha Osaka, Japan naduh 19 haduh ka 25 tarik mynta u bnai.
Ïa kane la pynbna da ka Indian Blind Football Federa-tion bad kane ka long ka jingsarong ïa ka Jylla bad ka ri hi baroh kawei.
U Marak uba la ïohpdiang ïa ka khusnam Kiang Nangbah ha u snem 2023, u la lah ban pynpaw ïa ka jingtbit kum u nongïalehkai. U la khur ïa ka hat-trick ha ka jingïakhun pyrshah ïa ka Uzbekistan ha u snem ba la lah bad u la lah ban ïalehkai bha ruh na ka bynta ka Meghalaya na ka bynta ban khur haduh saw sien ïa ka nam lahduh.
Kane ka lympung kaba ïalehkai tang san ngut (five-a-side) ki nongïaleh -kai ka dei ka jingïalehkai phutbol na ka bynta kiba matlah kaba kynthup ïa u nongapkol lem bad kiwei pat ki nongïalehkai.
Halor ka jingshah jied utei u rangïalehkai, na ka liang u Myntri Rangbah ka Jylla u Conrad K Sangma u la ïaroh ïa ka jingjop jong u Marak, da kaba kdew ba u dei u nongïalehkai phutbol uba nyngkong eh bad uba duna ka bor ïohi na kane ka jylla ban mihkhmat ïa ka ri India ha kane ka kyrdan ïalehkai. “Ngi sngew lyngngoh ïa ka jingtbit jong u bad ngi ai mynsiem ïa u. Ngi kitbok kitrwiang ïa u bad ïa ka kynhun ïalehkai ka ri India ba kin lah ha ka ban ïalehkai bha ha katei ka lympung”, la ong u Sangma.
