Tehran, Iaiong:
Ka Iran ha kane ka por, ka la pynpaw ba kam kwah shuh ban iakren iapynbeit bad ka US, watla ka US ka dang pyrshang ban wan sha ka miej iakren badn pynsangeh noh ïa ki kynrum- kynram ha ka thaiñ Middle East.
U president jong ka America, U Donald Trump, u la ong ba u dang phah ïa ki nongiakren sha Pakistan na ka bynta ban iakren halor ka jingpynkut noh ïa ka thma kaba la tap ïa katei ka thain bad kaba la pynkhih ïa ki iew ki hat jong ka pyrthei, ha kaba u la pynkynmaw biang ïa ki jingbyrngem ban thombor ïa ki lad pynmih bor ding jong ka Iran lada kam lah ban pyn urlong ïa ka jingiateh soskular.
Hadien ba ki jingïakren ba nyngkong ki la kut khlem da don ka jingïateh kular ha Islamabad ha kaba sdang jong une u bnai, baroh arliang ki la ïakren ïa ki jingkynnoh halor ka jingpynkheiñ ïa ka jingsangeh thma, kynthup ïa ka jingkem jong ka US ïa ka jhad kit mar jong ka Iran ha ka step jong ka Sngi Nyngkong kaba u Trump u la ong ba ka pyrshang ban lait na ka jingkhang jong ka US ïa ki kad lieng jong ka ri.
“Ngim don kano kano ka jingthmu na ka bynta ka jingiakren kaba bud, bad ym pat shym la shim ïa kano kano ka rai ha kaba iadei bad kane,” la ong u nongaiktien jong ka tnat kam bar ri, u Esmaeil Baqaei.
“Katba ka dawa ïa ka jingïadei bad ka jinglong ba la pynkhreh na ka bynta ka jingïakren, ka US ka pynlong ïa ki jingleh ki bym pyni ha kano kano ka rukom ïa ka jinglong khia ha kaba bud ïa ka jingïadei,” u la bynrap, da kaba khot ïa ka jingkhang dam jong ka US bad ka jingkurup ïa ki lieng kit mar “ki jingpynkheiñ ba shai ïa ka jingsangeh thma”.
Ka Iran, ka ong ba ka jingkhang bad jinghiar thma jong ka US, ka la pynkheiñ ïa ka jingïateh kular, kaba ar taiew, kaba la buh ban kut ha ka miet jong ka sngi Balang bad ka la byrngem ruh ban pynphai kylla, katba u Trump, u ong ba ka Tehran, ka la pynkheiñ ïa ka jingsangeh thma, ha ka duriaw Hormuz, kaba kongsan bha, kaba ka la khang lut.
Ki jingkynthoh pyrshah ki la buh ïa ka jingartatien kaba thymmai ïa ka jingthmu ban pynkut noh ïa ka thma kaba la sdang na ka jinghiar thma jong ka US bad ka Israel ïa ka Iran ha ka step jong ka 28 tarik u February, kaba la pynïap ïa u nongïalam ba ha khlieh duh jong ka ri, u Ali Khamenei.
“Ngi tyrwa ïa ka DEAL kaba hok bad kaba don jingmut bha, bad nga kyrmen ba kin shim ïa ka”, la ong u Trump ha ka jingthoh ha ka social media. Ka dor jong ka umphniang ka la kiew bha ha ka sngi Nyngkong namar ka jingtieng ba ki jingïaleh pyrshah ki lah ban sdang biang ha ka thma kaba la neh da ki taiew, hadien ba ka Iran ka la khang biang ïa ka Strait of Hormuz ha ka taiew ba kut hadien ka jingplie biang lyngkot jong ka ha ka sngi palei kum ka jingithuh ïa ka jingsangeh thma ha Lebanon.
