Tehran, Iaiong:
Ar tylli ki jhad kiba la shah thombor ha ka duriaw kaba hap hapoh ka jingkhmih jong ki shipai Paramilitary Revolutionary Guard jong ka Iran, mynta ki la shah rah sha Iran naka bynta ki jingtohkit bad jingwad bniah jong ka jingpynkheiñ ia ka jingpyrkhing jong ka Iran. Kitei ki jhad kiba la ithuh da ka Iran, ki long ka MSC Francesca bad ka Epaminodes. Kane ka long hadien ba ka US kham hashwa ruh ka la dep kurup donbor ïa 2 tylli ki jhad jong ka Iran namar ba ka jingïakren ban sangeh ïasiat ka dei ban long hapoh ka nongbah Islamabad jong ka Pakistan Kumta, ka tnat shipai duriaw jong ka IRGC ka la ong ba “kino- kino ki jingpynthut ia ka jinglong jingman bad ka jingshngaiñ ha ka duriaw ‘Strait of Hormuz’, yn kheiñ beit ba ka dei ka jingpynkheiñ kyndon na ka bynta ka Iran”. Ki shipai Revolutionary Guards, ki kren shaphang ki jingsiew dor bad ki jingsiew ia ka transit ban pyntreikam ha ki jhad bad ki ong ba kano kano ka jingiaid lynti, ka dei ban long ha ka jingiatreilang bad ki, ong ka khubor jong ka tnad pathai khubor Al Jazeera.
Kham mynshwa, ar tylli ki lieng ki la shah siat ha ka Strait of Hormuz, bad ka IRGC ka la ong ba ka la kurup “ar tylli ki lieng kiba pynkhein ia ka ain”.
Ka tnad treikam jong ka United Kingdom Maritime Trade Operations (UKMTO) jong ki shipai jong ka ri Bilat, ka iathuh ba ki shipai jong ka Iran, ki la hiar thma ia ka jhad kit mar, kaba nyngkong eh ha ki lynti um, ha ka por 7:55 baje mynstep, kaba la pynjulor ia katei ka jhad.
