Shillong, Ïaiong 24
U Primrose Lamat u kylla long u ba tyngshaiñ bha ha ka lympung ïalehkai jong ka 5th Meghalaya State League, hadien ka jinglah jong u ban thep haduh 6 tylli ki kol, bad kane ka la biang pura ïa ka kynhun ïalehkai ka Khimusniang SC ba kan lah ba kan pynliem noh ïa ka Umkaber SCC da 11-2 kol, ha ka jingïakhun jong ka Group A ba la long mynta ka sngi ha madan SSA Stadium. Ïa kitei ki kol, u Primrose u la ïoh ba un thep ha ka minit ba 16′, 19′, 24′, 38′, 73′ bad 79.
Ha kawei pat ka jingïakhun jong kane ka juh hi pat ka kynhun ka ka Nongkseh SSCC ka la lah ba kan pynliem noh da 6-2 kol ïa ka Mawshun SCC, kaba hangne u ‘rang ïalehkai ba dang shu dep ban soi shen ïa u, u Sheen Sohktung u la thep haduh 3 tylli ki kol ba la wan ha ka minit kaba 37′, 89’ bad 90’+4.
Katba ka resol na ka jingïakhun ka Group H ha Mawkyrwat ka Rangdajied United FC ka la ïakhaid noh da mar shi kol bad ka kynhun ïalehkai Mawlarshong SC.
Haba phai sha kane ka jingïakhun, u Hopefullness Wanniang u la lah ban lam khmat ïa la ka kynhun ban tam shakhmat da ka shi kol ha ka minit kaba 18, ïa kaba u Gideon Mukhim ka RUFC u la ïoh ïa ka kabu ban pynphai noh ïa kane ka kol ha ka minit kaba 41. Ka RUFC ka dei kaba nyngkong napdeng ki klob heh jong ka nongbah Shillong ban nym lah ban jop mynta u snem.
Katba ka kynhun ïalehkai ka Mawlai SC kaba bat ruh ïa ka nam kum ka lahduh jong kane ka lympung ka la lah ba kan pynliem noh ïa ka Laskein SCSC da 4-1 kol, ha ka jingïakhun kaba dei na bynta ka Group C ba la long ha Amlarem. Katba ka jingïakhun ha Mairang, jong ka Group F, ka Langsning FC ka la pynliem da 6-0 kol ïa ka Umlakro SC.
Katba ka khubor na ka jingïakhun jong ka Group B ba la long ha madan MFA Turf Third Ground Polo, ka Nangkiew Irat FC ka la pynliem da 7-1 kol pyrshah ïa ka Mawlum Tyrsad, kaba hangne u Neblejohn Lyngkhoi u la lam khmat ïa ka kynhun ban thep haduh 3 kol ha ka minit kaba 9, 12, bad 42.
Ha ka jingïakhun jong ka Group G, ka Attong Matgrik FC ka la pynliem ïa ka Maram FC da 2-1 kol, ka jingïakhun ba la long ha Williamnagar.
Kyntang ïa wai, ka resol na ka jingïakhun ba la long ha Khliehriat, ka jingïakhun ha madan ka long hapdeng ki artylli ki kynhun ba dei na ri lum Jaiñtia, ha kaba ka Rymbai Shkenshynriah SC na East Jaiñtia Hills ka la pynliem noh ïa ka Ladthadlaboh SC na West Jaintia da 3-0 kol kaba dei ka jingïakhun ka Group D bad ïa kine ki 3 kol, la thep ïa ki da u D. Skilful Tariang (33′) bad Hesmiki Rymbai (51′, 81′).
