Tehran, Iaiong:
U Nongïalam ba ha khlieh duh jong ka Iran, U Mojtaba Khamenei, u shaniah ha ka jingai jingmut jong ki heh shipai kiba don ha ka kynhun shipai Islamic Revolutionary Guards Corps ban pynïaid ïa ka ri, kiba ïatylli ki shim ïa ki rai.
“U Mojtaba u pyniaid ïa ka ri kumba u dei u nongpyniaid jong ka board. U shaniah shibun ha ki jingai jingmut bad jingpyniaid jong ki dkhot jong ka board, bad ki iatylli ki shim ïa ki rai baroh. Ki general ki dei ki dkhot jong ka board,” la ong u Abdolreza Davari, u riew sain pyrthei uba la long u nongiarap ba ha khlieh duh jong u President barim ka Iran. U Mojtaba u la rieh tngen naduh ba ki jinghiar thma jong ka US bad ka Israel ki la pyniap ïa u kpa jong u u Ayatollah Ali Khamenei ha ka 28 tarik u Rymphang. Wat la u la lait im da ki jingmynsaw, hynrei ka tnga bad u khun jong u ruh ki la ïap ha katei ka jingshah bom. Mynta, ka lad ban leit sha u ka long kaba duna, tang ki doktor bad ki nongtrei ka koit ka khiah kiba sumar ïa ki jingmynsaw jong u. Ban khanglad ïa ka jingbuddien jong ki Israel bad ki jinghiar thma kiba lah ban jia, ki nongïalam ba rangbah jong ki shipai bad saiñ hima sima jong ka Iran ki la sangeh noh ban leit jngoh ïa ka Mojtaba. Ia kane ka jingsumar jong u, la peit mynta da u myntri ka tnat ka koit ka khiah bad u President ka Iran, u Masoud Pezeshkian, uba dei ma u hi u doktor sumar dohnud. Ka kaiphod ka ong ba watla u Nongialam ba ha khlieh duh u la “mynsaw jur”, hynrei u long uba stad ha ka jingmut jingpyrkhat bad uba la shimkhia.
Kawei ka kjat jong u ka la shah sumar lai sien, bad un pyndonkam da ka kjat thok na ka bynta jongka. Ka kti jong u ruh ka la shah sumar bad suki suki ka la sdang ban treikam biang.
Ka khmat bad ki rmiang shyntur jong u ki la shah thang jur, kaba pynlong ïa u ban shem jingeh ban kren. Ki heh sorkar ki la ong ba u lah ban donkam wat ban leh da ka ‘plastic surgery’ ban pynwan dur biang ïa ka dur khmat jong u.
