Washington, Iaiong:
U President ka United States, u Donald Trump u la ong ba ka Israel bad ka Lebanon ki la mynjur ban pynjlan lai taiew ïa ka jingsangeh iasiat hapdeng ka Israel bad ka kynhun Hezbollah hadien ka jingiakren ha White House ha ka Sngi Palei.
U Trump u la ong ba ka jingïakynduh hapdeng ki nongmihkhmat jong ka Israel bad Lebanon sha America, kaba ar ha ka taiew ba la dep, ka la ïaid “bha bha,” hynrei ha ka jingïalang jong ka Oval Office u la kam ba “ki don shisha ïa ka Hezbollah ban pyrkhat.” Ka kynhun kaba la kyrshan da ka Iran, ka la pyrshah ïa katei ka jingiakren, bad naduh ba ka jingsangeh siat kaba nyngkong, ka la treikam ha ka sngi palei ba la dep, ki la don bunsien ki jingpynkhein ain, na baroh arliang mamla.
Wat hapdeng kata, kine ki dei ki jingïakren ba beit ba nyngkong eh ha ki phew snem hapdeng ka Israel bad ka Lebanon bad ki la mihkhmat ïa ka sienjam kaba kongsan na ka bynta ki ri ba marjan kiba la don ha ka thma naduh ba la sdang ïa ka Israel ha u snem 1948. Ka jingsangeh thma kaba nyngkong kaba 10 sngi ka la dei ban kut noh ha ka sngi Nyngkong.
“Ka America, ka thmu ban iatreilang bad ka Lebanon, na ka bynta ban iarap ïa ka, ban iada ialade, na ka Hezbollah”, la ong u Trump, ha ka social media. U la bynrap kham hadien ha Oval Office ba u khmih lynti ban ïakynduh ha Washington bad u Myntri Rangbahduh ka Israel, u Benjamin Netanyahu bad u President ka Lebanon, u Joseph Aoun, ha kine ki ar taiew ban wan.
