Jerusalem, Iaiong:
U Myntri ka tnat ïada ri jong ka Israel, u Israel Katz, ha ka Sngi Palei, u la ong ba ka Israel ka dang pynkhreh ban bteng biang ïa ka thma hapoh Iran, ha kaba, u la ong ba ka ri jong u, ka la shu ap sa tang ïa ka dak na ka United States ba kan ioh ban sdang biang ïa ka thma bad ban pynkylla biang ïa ka Iran sha ka juk maw.
“Ngi dang ap ïa ka jingshai kaba saw na ka ri America – nyngkong eh ban pyndep ïa ka jingpynduhjait ïa ka hima Khamenei… bad nalor kata ban pynphai biang ïa ka Iran sha ka Juk Dum bad ka Juk Maw da kaba pynpra ïa ki jaka ba kongsan jong ka bor ding bad ka bording bad ban pynpra ïa ki jingtei ba kongsan jong ka ïoh ka kot jong ka ri,” u la bynrap.
Ka jinghiar thma ba sdang jong ka US-Israel ïa ka thma ha ka 28 tarik u Rymphang, ka la shim ïa ka jingim jong u nongïalam ba hakhlieh duh jong ka Iran, u Ali Khamenei, uba u khun jong u, hadien u la shimti ïa ka jaka jong u, tangba um pat paw ha khmat ki paidbah, kaba la pynmih ïa ki jingkynnoh halor ka jinglong jingman jong u bad lada u dang im.
“Ha kane ka kynti, ynda ka jinghiar thma kan sdang biang, kan long kaba pher bad kaba pyniap briew, kaba pyndap ïa ki jingshah thombor kiba shyrkhei ha ki jaka kiba kham khia — hadien ki jingshah thombor kiba shyrkhei ba ka sorkar lehnoh jong ka Iran ka la dep ban pynlong — ki ban pynkhih bad pynhap ïa ki nongrim jong ka,” la ong u Katz.
U President ka America, U Donald Trump, ha ka sngi Ba-ar, u la pynbna ban pynjlan khlem pud ïa ka jingsangeh iasiat hapdeng ka America bad ka Iran, kaba la sdang treikam naduh ka 8 tarik u Iaiong, na ka bynta ban plie lad ïa ka jingiakren bad ka Tehran.
Ki jingthmu ban pynthymmai ïa ka jingiakren ha Pakistan ki dang sahkut ha ka jingeh.
Ka thma Middle East, ka la lynshop ïa katei ka thain, ha kaba la pyniap ïa ki katto katne hajar ngut ki briew, khamtam ha Iran bad Lebanon, bad ka dang iai bteng ban pynthut ïa ka ioh ka kot jong ka pyrthei.
