Jerusalem, Iaiong:
U Benjamin Netanyahu, myntri rangbah duh jong ka Israel, ula kynnoh ba ka Hezbollah ha ka Sngi Thohdieng, ka pyrshang ban ” pynthut” ia ki jingpyrshang ban poi sha ka jingiakren iasuk bad ka Lebanon.
“Ngi la sdang ïa ka buit ban poi sha ka jingsuk kaba don histori hapdeng ka Israel bad ka Lebanon, bad ka paw shai ha ngi ba ka Hezbollah ka pyrshang ban pynthut ïa kane,” u la ong ha ka jingkren ba nyngkong jong u hadien ba la pynjlan ïa ka jingsangeh thma bad ka Lebanon.
Kitei ki jingkren ki la wan ha ka por ba ki shipai Israel ki la ong ba ki la thombor ïa ki thong jong ka Hezbollah ha kawei ka shnong kaba don shathie jong ka Lebanon kum ka jingkynthoh ïa ka “jingpynkheiñ ïa ka jingsangeh siat”, hadien ba ki la maham kham mynshwa ïa ki nongshong shnong ba kin pynkynriah noh ïa katei ka shnong.
“Khyndiat por mynshwa, ka IDF ka la ther ia ki jingtei shipai ha ka thain Deir Aames, na kaba la pynher rocket sha ka nongbah Shtula ha Israel hynnin ka sngi,” la ong ka khubor.
“Ki jingtei kiba la shah thmu la pyndonkam da ka seng lehnoh Hezbollah ban pynïaid shakhmat ïa ki kam lehnoh pyrshah ïa ki shipai IDF bad ïa ka Jylla Israel,” ka la bynrap.
U nongaiktien jong ki shipai, uba kren ha ka ktien Arabic, U Avichay Adraee, kham mynshwa, u la maham ia ki nongshong shnong jong ka Deir Aames, ba ki dei ban “kynriah noh mardor na ki iing ki sem jong phi bad ban kynriah la kumno kumno 1,000 meter shabar jong katei ka jaka”.
“Namar ki kam lehnoh jong ka Hezbollah, ka IDF ka pynlong ia ki kam thombor ha katei ka jaka,” u la ong hapoh ka rynsan X.
Ka Deir Aames ka don shaphang shatei jong ka jaka ba la khot ka “Yellow Line” ha Lebanon, ha kaba ha lyndet jong ka ki shipai Israel ki dang treikam wat hapdeng ka jingsangeh siat.
Ha kaba iadei bad ka Iran, u Netanyahu u la ong ba u la don ka jingiakren kaba bha bha bad u president jong ka America, u Donald Trump, khlem da batai shai lano kitei ki arngut ki la ia kren.
“U buh jingeh bha ia ka Iran, ha ka liang ka ioh ka kot bad ka liang ka shipai. Ngi iatreilang ha ka jingiatreilang kaba pura,” u la bynrap.
