Shillong, Ïaïong 27
Ka Mawlai Sports Club ka la khur jingjop ha kaba sdang ïa ka lympung ïalehkai I-League 3 2025-26, hadien ba ka la pynliem ïa ka Sikkim Brother-hood FC da 3-1 kol ha ka lah sngi U Blei ha Khuman Lampak Stadium kaba ha Imphal, Manipur.
Kane ka nam jop ka la wan lyngba u Wadshwa Latoo, Basuklang Bina bad u Basuklang Bina na ka bynta ban khur ïa ki lai poiñ ha ka Group-A.
Kumba ka paw kane ka jingïakhun kalong kaba kaba itynnad bad kaba ïakhaid bha ha kaba baroh ar ki kynhun ki la ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step.
Hadien katto katne por ba la bteng ïa ka kylla miet, ka Mawlai ka la ïoh ban pynkhih jar nyngkong lyngba u Wadshwa ha ka minit kaba 51. Kane ka kynhun hapoh ka jingïalam u Bah Hering Shangpliang ka la thep biang ïa ka kol kaba ar lyngba u Basuklang (61′) hashwa ba un thep biang sa shi kol ha ka minit kaba 75. Watla ka Sikkim ka la shah thep haduh lai kol, hynrei kam shym la duh jingkyrmen ha kaba ka la pynphai kylla shi kol lyngba u Sourav Biswas (76′) bad ha kaba kut ka la mad ïa ka jingshah rem. Ïa ka nam Player of the Match la khur da u Lambhamiki Lamare.
Ka Mawlai kan pynkhreh ïa ka jingïakhun kaba ar pyrshah ïa ka Sunrise Club Orissa ha ka sngi Balang (29 tarik).
