Jakarta, Iaiong:
Katkum ki kaiphod ba la ioh lum jingkheiñ thymmai da ki tnat iarap jong ka Indonesia, la iathuh ba ka jingdon jong kiba khlad na ka jingjia iatyngkhuh rel hapoh ka nongbah Jakarta jong katei ka ri, ka la kiew sha ka 14 ngut bad 84 ngut kiba la lap ba ki la mynsaw ha katei ka jingjia, la iathuh katei ka tnat ha ka Sngi Ba-ar, katba ki kynhun iarap ki dang ialeh ban sei ïa kito kiba dang sahkut hapoh jong katei ka rel kaba la jot bad julor.
Katei ka jingiatyngkhuh hapdeng ka rel kit nongleit nongwan bad ka rel kaba iaid jngai, ka la jia ha ka por janmiet jong ka sngi Nyngkong ha Bekasi, kaba don shabar jong ka nongbah Jakarta.
U Bobby Rasyidi, uba dei u heh duh jong ka kompeni rel jong ka jylla Indonesia, ka PT KAI, u iathuh ba ka jingiap, ka la kiew sha ka 14ngut bad ba ka jingtrei ban pynkynriah briew, ka dang iaid shakhmat.
U Mohammad Syafii, uba dei u khlieh jong ka tnat wad bad pyllait im jong ka Indonesia, u la ong ha ka jingialang bad ki nongthoh khubor ha ka step jong ka sngi Balang ba ka dei ka kam kaba eh bha ban pyllait im ïa kiba lait im na ki kali ba la shah pynpra.
Ki nongpyllait im ki la pynlait ïa ki rel, la ong u nongsakhi jong ka Reuters. La iohi ïa ki ba ki pyndonkam ïa ki Angle Grinder ban ot lyngba ïa ki nar jong ki jaka shong rel bad ban poi sha ki briew kiba lait im.
U Bobby u la iathuh ha ka jingialang bad ki nongthoh khubor ba katei ka rel kit nongleit nongwan ka la ïa tyngkhuh nyngkong bad kawei ka taksi ha ki lynti iaid bad hadien kata ka la shah tynrah ha katei ka rel kaba iaid jngai. Ka kali kaba dei tang ki kynthei ka la kit ïa ka jingkit kaba khia jong ka jingshah tynrah.
Ka kompeni Taxi Green SM Indonesia, ka iathuh ha ka Instagram, ba katei ka Taxi, kaba ngat ha katei ka jingjia, ka dei shi bynta jong ki kali jongka. Ka la ong ba ka la phah jingtip sha ki bor ba dei peit ban iarap ha ka jingtohkit.
Ka Green SM Indonesia ka dei ka tnat jong ka Indonesia jong ka kompeni pyniaid kali elektrik na Vietnam kaba dei ka Green and Smart Mobility JSC, kaba dei ka tnat treikam jong ka Vingroup.
Hadien ba u la leit jngoh ïa kawei ka Hospital ha Bekasi, u President Prabowo Subianto u la ong ba u la mynjur ban shna ïa ka Flyover hajan ki lynti ïaid rel khnang ban ïarap ban pynbeit ïa ka jingdheng kali kaba jur bha, bad bynrap ba ki bor ba dei peit kin sa tohkit ïa kane ka jingïatyngkhuh kali. U la ong ba ki bynta kiba heh jong ka lynti rel kim long kiba la pynbha bha.
Na ka liang jong ka National Transportation Safety Committee (KNKT) jong ka Indonesia, ka dang tohkit ïa kane ka jinghap liengsuin.
Ha ka Sngi Ba-ar, ki nongpyllait im bad ki briew ki la hiar halor ka jaka ieng rel, don kiba wad ïa kiba ha iing ha sem jong ki. La iohi ïa uwei u briew uba iam katba u dang bat ïa ka pla snam jong u hynmen jong u.
Ka Heriyati, ka nongleit nongwan, ka la ong ba ha kaba sdang ka la thmu ban pyndonkam tang ïa ka kali jong ki kynthei hynrei ka la jied ïa kata kaba don shadien jong ka. Ka la don ha ka phone bad u tnga jong ka ban kyrpad ïa u ban leit shim ïa ka na steshon ha ka por ba jia katei ka jingshah tynrah kali.
“Ngam pat dep wat ïa ka jingkhot bad ki rel ki la ïa tyngkhuh,” ka la ong.
Ki rel commute line ki long katto katne na ki rel kiba bun briew tam ha Jakarta, ka nongbah kaba bun briew tam ha ka pyrthei. Kumta ha ka Sngi Ba-ar, u PT KAI u la ïathuh ba katto katne tylli ki jingleit jingwan jong ki rel nongleit nongwan ki la shah pynthut namar ka jingshah tynrah.
Ki jingjia aksiden ha ka leit ka wan sha khyndew ki long kiba ju jia ha Indonesia. Ka jingtyngkhuh rel ha West Java province ha u snem 2024, ka la pyniap ïa saw ngut ki briew bad mynsaw da ki phew ngut.
