Taipei, Iaiong:
Ka Taiwan la ong ba ka la iohi ïa 2 tylli ki jhad thma jong ka China hajan ka dew lynnong Penghu kaba don hapoh u pud- u sam jong ka Taiwan Strait bad na ka liang jong ka Taiwan ruh ka la phah ïa ki jhad thma bad ki liengsuiñ thma jongka ban pahara ïa katei ka bynta lada jia ba ka China ka thmu ban pyni bor ne sdang leh donbor ïa katei ka bynta.
Namar la ong ba ka China ka ju kam trai beit ïa ka Taiwan kaba la synshar da ka jingsynshar paidbah, ba ka long ka bynta jong ka China bad kumta ruh ka ju phah ïa ki liengsuin thma bad ki liengsuin thma jongka sha ki um bad ki suiñ sawdong jong katei ka dew lynnong la jan man la ka sngi.
Katba ka tnat ïada ri jong ka Taiwan ka ai ïa ki jingpynbna ba man ka sngi shaphang ki jaka jong ki liengsuiñ shipai jong ka China, ka ai tang khyndiat eh ïa ki jingtip ba bniah shaphang shano ki liengsuiñ thma jong ka China ki treikam, ha ka jingïalang tang haba ka lap ïa ki liengsuiñ kit liengsuiñ, kumba la jia ha ka taiew ba la dep.
Ha ka por janmiet jong ka sngi Nyngkong, ka tnat ka la ong ba kawei ka jhad pynjot jong ka China bad ka jhad shipai ki la rung sha ki um shaphang shathie jong ki ïew Penghu, kiba don ki jaka sah jong ki shipai duriaw bad suiñbneng ba heh jong ka Taiwan bad kiba don hajan ka liang jong ka Taiwan jong ka duriaw bah.
Ki shipai jong ka Taiwan “ki la buddien bha ïa ka jingpynlong bad ki la jubab katkum ka jingdonkam da kaba pyndonkam ïa ki shipai duriaw bad ki shipai suiñ”, la bynrap shuh shuh ka tnat, khlem da batai bniah.
Ka tnat ka la pyni ïa ki dur rong jong baroh ar tylli ki lieng kiba la shim na suin, hynrei kam shym la ai ïa ka jaka kaba thikna.
Ka tnat iada ri jong ka China kam shym la jubab mardor halor ka jingkyrpad ban ai jingmut. Ha kaba sdang jong une u bnai, ka la ong ba ki kam shipai ba man ka por jong ka China ha kylleng ka Taiwan ki long “kiba don nongrim bad kiba don jingmut pura” bad kino kino ki jingïakynad ki dei ka jingbakla jong ka sorkar ha Taipei.
Ka sorkar Taiwan, ka kyntait ïa ka jingdawa synshar jong ka Beijing, da kaba ong ba tang ki briew katei ka dewlynnong, ki lah ban rai ïa ka lawei jong ki.
