Tacoma, Jymmang:
Ki pulit ka Tacoma ki la pyntip ba 5 ngut ki la mynsaw na ka jingjia duh tari hapoh kawei ka skul kaba don ha katei ka nongbah, ha kaba utei u nong thombor ruh u la mynsaw ïalade hapdeng ka jingiakhun bad kitei kiba don ha katei ka jaka.
U nongrah ktien jong ka tnat pulit Tacoma, u Shelbie Boyd u la iathuh ba ïa utei u runar, uba dei u khynnah pule jong katei hi ka skul, la rah sha thanat na bynta ki jingtohkit kiba bniah bad la ong ba ma u ruh u la mynsaw lang ïalade ha katei ka jingleit thombor jong u ha katei ka sngi.
Ia baroh kitei kiba mynsaw pat la pynkit noh sha jakasumar, kynthup ïa utei u nongthombor ha katei ka jingjia.
La ong ba ka tnat ba dei khmih, ka la ioh jingtip ha ka por 1;38 nohphai sngi jong ka Sngi Palei na katei ka skul Foss High School kaba don ha ka nongbah Tacoma, ha kaba la ioh ban pynkit noh sha jaka sumar ïa baroh 5 ngut kiba mynsaw na katei ka jingjia. Ha kaba, 4 ngut kitei kiba shah dung tari, ki la mynsaw jur bha.
Katba, sa uwei pat uba 6, u dang don mynta ha ka kti ki pulit bad ma u ruh u la don katto- katne ki jingmynsaw bad la pynkit lang ïa u shuwa sha jakasumar bad hadien kata yn sa pynlong ka jingtohkit bniah ïa u bad ïa baroh kito kiba iadon kti lang ha katei ka jingjia ha katei ka sngi.
Kumta la ong ba katei ka skul, ka la sangeh treikam noh naduh katei ka por 1:38 nohphai sngi jong ka Sngi Palei tang mar ïa iohsngew ïa katei ka khubor bad la pyllait noh ïa ki khynnah pule baroh ha ka por 2:45.
Hynrei ïa ka jingpule baroh yn sdang biang naduh ka Sngi Nyngkong ha ryngkat ka jingdon jong ki nong-ap pahara ba la buh kyrpang da ki bor pyniaid katei ka nongbah naka bynta ka jingshngaiñ jong ki khynnah pule bad ki nongtrei jong katei ka skul.
