Washington, Jymmang:
U President ka United States, u Donald Trump, ha ka Sngi Palei u la kynthoh ïa u heh ka Germany – u Friedrich Merz, ba um lah shuh ban pynbiang ïa ki kam- ki jam jong u hapoh iing lajong bad u da kyrpad ruh ïa une u nongsynshar ba hadien, ba un pynleit jingmut ha ki jingeh kiba don ha la iing namar ba ka jingiapher hapdeng kitei ki arngut, ka nang jur, halor ka rukom pynbeit ïa ka jingiakynad ha Iran.
Ha ka jingïalang ban soi ïa ka hukum ha ka ophis jong ka The Oval, u Trump u la ong, “U nongsynshar jong ka Germany u la pulom lut ki kam ki jam ha iing- ha sem. U don jingeh ha ka liang ka jingwan buhai shnong bad ka bor ding, bad ka jingeh bad ka Ukraine. U la kynthoh ïa nga na ka bynta ka Iran, kumta nga la kylli ïa u, “Hato phi kwah ba ka Iran kan don ïa ki tiar nuclear?” U la ong, “Nga tharai, em.”
Ha ka jingkynthoh kaba kum kane, u Trump u la ong ba u Metz u dei ban pynleit jingmut ha ka jingïakynad hapdeng ka Russia bad ka Ukraine bad kumjuh ruh ban sangeh noh ban tuklar ïa ki ri kiba pyrshang ban khanglad ïa ka Iran ban pynmih ïa ki tiar nuclear.
“U Chancellor jong ka Germany u dei ban pynlut kham bun ka por ban pynkut noh ïa ka thma bad ka Russia/Ukraine (Ha kaba u la long uba khlem treikam satia!), bad ban pynbeit ïa ka Ri jong u kaba la pra, khamtam eh ïa ka jingwan buhai shnong bad ka bor ding, bad kham duna ka por ban tuklar ïa kito kiba lait na ka jingma jong ka Iran, da kaba pynlong ïa ka Pyrthei, kynthup ïa ka Germany, ka jaka kaba kham shngain!” u la ong.
Ha kajuh ka por, ka jingkhot jong u Trump ban pynduna ïa ki shipai US ha Germany, ka la pynlyngngoh ïa kiba bun kiba don ha Pentagon, ong ka khubor Politico.
U nongïarap jong ka Congress u la ïathuh ha ka Politico, Ka Pentagon kam shym la khmih lynti ïa kane bad kam shym la thmu ban weng noh ïa kano kano ka rukom. Hynrei ngi hap ban shim khia ïa u namar ba u la shim khia bha ïa kane ha ka por ba u synshar nyngkong eh.”
Ha ka jingthoh ha ka Truth Social platform jongu, u president jong ka US u la ong ba ka sorkar jong u ka dang “bishar bniah ïa ka jinglah ban pynduna ïa ki shipai ha Germany,” ha kaba la khmih lynti ïa ka rai shen.
Kane ka jingkren ka la wan ha ka por ba u Friedrich Merz u la ai jingmut ba ka kynhun jong u Trump ka shah lehbeiñ ha ka jingïakren bad ka Iran kaba thmu ban pynkut noh ïa ka jingïakynad bad ban plie biang ïa ka duriaw bah Hormuz.
