Khliehriat, Jymmang 01
Ka Sham Sham Secondary School kala khur ïaka nam Overall Champion ha ka lympung ïalehkai District Level Inter School Athletics Meet 2026 ba la pynïaid da ka ophis District Sports Officer (DSO), East Jaiñtia Hills.
Kane kala wan hadien ba ka Sham Sham Secondary School kala khur haduh 89 poiñ ha ka jingïalehkai pynkut ha madan Teilang Dkhiah West, East Jaiñtia Hills District ha ka 1 tarik Jymmang.
Ha kane ka sngi la donlang u Deputy Commissioner, East Jaiñtia Hills District, Manish Kumar, IAS, kum u kongsan ha ryngkat ka jingdon lang ka District Sports Officer (DSO), East Jaiñtia Hills District, ka Kong Stephanie M Rapsang, u Principal Jaiñtia Eastern College (JEC) Dr Phervision Nongtdu nalor kiwei-kiwei.
Ha ka jingkren u Deputy Commissioner ka East Jaiñtia Hills District, Manish Kumar, IAS u la pynpaw ba watla kane ka sngi ka dei ka jingkut jong ka athletics meet, hynrei kane ka jingïalehkai kam shym la long tang halor ka jingïakhun hynrei ka dei ruh ban pynrung ïa ki jinglong ba kongsan kum ka jingtrei shitom, ka jingaiti lut bad ka jingïaishah bad ai khublei ïa baroh ki khynnah pule kiba la ïashim bynta, da kaba ban jur ba ka jingïashim bynta hi ka pynpaw ïa ka jingshlur, ka jingaiti bad ka jingkut jingmut.
Haba pynpaw ïa ka jingmut kaba kham jylliew jong ka jingïalehkai, u Kumar ula ong ba ka jingïalehkai kam dei tang ka jingïalehkai met hynrei ka ïarap ban pynneh ïa ka jinglong kaba ïadei hapdeng ka jingkoit jingkhiah ha ka met bad ka jingmut jingpyrkhat bad hapdeng ka jingim ha ka kam bad ka jingim shimet.
Ïa ka jingïalang la pynkut da ka jingsam khusnam, ha kaba ka KB Memorial Higher Secondary School bad Sham Sham ki long ki nongjop ha baroh ar ki kyrdan jong ki khynnah shynrang bad kynthei hapoh 14 snem bad hapoh 16 snem. Katba ka Wapung Higher Secondary School bad ka San Shnong kila khur jingjop ha ka kyrdan Under-18 Boys bad Under-18 Girls.
Hadien ka jingïalang la sam ruh ïa ki khusnam sha ki nongïalehkai ba tbit tam ha baroh ki lai tylli ki kyrdan ïalehkai.
Haka Under-14 u Ready Ryngkhlem jong ka Wapung Higher Secondary School ula ïoh khur ïa ka nam Best Male Athlete. Katba ka Lamsaka Dkhar jong ka Sham Sham Secondary School kala ïoh khur ïa ka nam Best Female Athlete ne kum ka nongïalehkai kynthei ba tbit tam.
Ha ka Under-16 u Highbornson Muksor na Khliehriat Presbyterian Secondary School bad ka Sandiya Dkhar na Sham Sham Secondary School kila ïoh khur ïa ka nam Best Male and Best Female athletes.
Ha ka kyrdan ïalehkai Under-18, u Lastduh Lamurong jong ka Don Bosco College bad ka Rosy Sana jong ka San Shnong Secondary School, Mukhaialong kila ïoh khur ïa ka nam Best Best Male and Best Female athletes.
Ka ophis DSO ka pyntip ba ki nongjop ha ki jingïalehkai bapher bapher kin mihkhmat ïa ka East Jaiñtia Hills District ha ka State Level Inter School Athletics Meet ka ban sa long shen.
